PROPOSISHON PLASTERK TA INAKSEPTABEL I NO-DEMOKRÁTIKO

E proposishon di minister Plasterk di Ulanda tokante un areglo di disputa den Reino Ulandes ta inakseptabel. Esaki pasombra e minister ta kombensí ku ora tin un disputa entre Reino i sea Kòrsou, Aruba o Sint Maarten, ta un organisashon no-independiente i ligá na e gobièrnu di Ulanda ta disidí ken tin rason si o no. I lokual ta mas inkreibel ta ku Den Haag ta liber pa rechasá e desishon. Esaki aparentemente Den Haag ta konsiderá komo demokrasia i bon gobernashon. Willemstad, Oranjestad i Philipsburg mester manda un mensahe bon kla pa e Ulandesnan: no ta akseptá e proposishon di minister Plasterk. E ta un insulto pasombra e ta kontra di tur prinsipio di demokrasia i estado di derechi.

Ta opvio ku e proposishon di minister Plasterk ta ekivalente na un karnisero ku ta disidí e mes si su karni ta bon i no mester di un inspektor independiente pa hasi esaki. Na mi manera di mira e aktitut arogante aki ta basá riba un grandesa kolonial di pasado ku Den Haag tin masha problema pa laga lòs. Durante di e último 4 añanan ami semper a lucha pa un un areglo di disputa ku ta independiente i ku no tin ni sikiera e sombra di ta dependiente. Tambe a lucha pa e desishonnan di e outoridat di disputa den Reino ta final. Nada ku Ulanda ta liber pa akseptá nan si o no. Ta esaki finalmente e 4 parlamentonan den Reino a para p’e.

Ta inkomprendibel pues ku awe ta pone e parlamentonan un banda i ta manda un proposishon ku no ta tuma e puntonan di salida di e 4 parlamentonan na kuenta. Pa kolmo ta manda e proposishon aki Raad van State (RvS) pa konseho mientras ku minister Plasterk su intenshon ta pa e mesun RvS disidí ora tin un disputa. Promé ku e proposishon aki a bai RvC, su vise Presidente a sali públikamente na fabor di e organisashon aki pa resolvé disputa den Reino. Segun e vise Predisdente tin dos departamentu den RvS ku ta independiente di otro i ta p’esei RvS ta independiente. Bèrdat e dos departamentonan ta independiente di otro, pero e organisashon RvS no ta independiente. Na di promé lugá nos no mester lubidá ku e Presidente di RvS ta Rei Willem Alexander ku tambe ta na kabes di Reino Ulandes. Kòrda ku ta trata aki di disputanan entre di Reino i Willemstad, Oranjestad o Philipsburg. Na di dos lugá, durante di e último siglo delaster un vise Presidente di RvS ta un èks polítiko di Ulanda. RvS ta prinsipalmente un órgano di konseho pa Den Haag i en bista di lokual mi a bisa anteriormente, RvS no ta independiente o a lo ménos no ta sin un sombra di dependensia di ‘politiek Den Haag’.

Un areglo pa disputa mester ta independiente, liber di kualkier sombra di dependensia. Ademas su desishonnan mester ta final. Kualkier proposishon ku ta desviá for di e puntonan di prinsipio aki ta no-demokrátiko i no-deseabel. Pa mas detaye riba kontenido pa un areglo di disputa mi ta referí na mi artíkulo anterior: https://alexdavidrosaria.blog/2017/01/16/no-dispute-mechanism-no-democracy-in-the-kingdom/