Gobièrnu lihé mester disidí riba e union monetario Kòrsou-Sint Maarten. Echo ta ku e no ta funshoná pasombra no tin, despues di 7 aña, mekanísmo pa atendé ku kordinashon makroekonómiko ka ta nesesario pa un union monetario. Tambe pa kasi dos aña no tabatin kombersashon entre di e ministernan di Finansa di e dos paisnan pa atendé ku e union. Mientras ku mester di kordinashon di maneho, kada pais ta hasi lokual ku e ke i konsekuentemente kada dia ta bira mas difisil pa start ku e kordinashon nesesario. Esaki ta lòs for di e situashon indeseabel entre di gerensia di banko sentral (CBCS) i su hunta di komisario. Tin falta di akuerdo entre di Willemstad i Philipsburg i pa kolmo e minister di Finansa di Kòrsou a bisa aña pasá ku evaluason di e union monetario no ta prioridat.
Kòrsou mester determiná kiko e ke. Nos ke keda den e union? Na vários okashon Sint Maarten a bisa ku e ta sali. Ta dolarisá? Sint Maarten si a bisa esaki. Nos ta warda te ora nan tuma e desishonnan importante pa despues nos drenta akshon? Den mi bista Kòrsou ku ta responsabel pa kasi 75% di e union aki no por sinta pasivamente mira manera e a hasi te awor.
For di 2008, promé ku e union monetario drenta na vigor, mi a oponé kontra di dje. For di e tempu ei tabata klaritu ku e desishon pa un union monetario no tabata basá riba fundamentonan ekonómiko, pero mas bien un obligashon pasombra Den Haag no ta(bata) konfia Sint Maarten ku su propio banko sentral. Den un resien artíkulo (https://alexdavidrosaria.blog/2017/02/09/waning-hope-for-monetary-union-sint-maarten-curacao/?iframe=true&theme_preview=true) mi ta bai den mas detaye i ta demostrá ku no tin ehèmpel di unionnan monetario ku a sobrebibí ora nan keda formá pa paisnan ku anteriormente tabata huntu polítikamente.
Mi ta boga pa kurashi di Willemstad pa tuma desishon. Sea nos ta sali òf, komo opshon dos, ta keda basta tur hende realmente ke esaki, i ta start ku e mekanísmonan di kordinashon nesesario. Status quo no ta opshon.
Alex David Rosaria Blog 