Vários hende a kere ku e resien kaida di Gabinete Koeiman despues di solamente 53 dia tabata un rèkòrt den nos historia di demokrasia parlamentario. Esaki sinembargo no ta bèrdat. E rèkòrt apsoluto ta di apenas 37 dia i esaki ta riba nòmber di Gabinete da Costa Gomez (òf Kolegio-da Costa Gomez). Tuma nota ku ami ta tuma e periodo di demokrasia parlamentario den nos pais (1938 – aktual) pa mi hasi e komparashon aki. Promé ku nos atendé ku kaida aparatoso despues di 37 dia di Gabinete da Costa Gomez, ta bon pa pinta e konteksto polítiko di e tempu ei.
Nos a konosé un era nobo den nos demokrasia parlamentario na momento ku e konstitushon nobo a drenta na vigor riba 8 yüni 1948. E konstitushon nobo a hasi posibel pa krea pa promé biaha den nos historia un College van Algemeen Bestuur (CAB). E CAB tabata konsistí di un máksimo di seis (6) miembro ku mester a yuda Gobernadó den su tareanan di maneho di e seis islanan, Curaçao. Na promé bista e CAB awe lo no ta mustra di ta un ‘gran kos’ kisas, pero pa e tempu ei esaki tabata un paso grandi den e proseso di emansipashon polítiko di nos pais. E intenshon tabata for di un komienso pa CAB krese i bira un órgano mas independiente i no simplemente un instansha ku tabata yuda Gobernadó den su tareanan ehekutivo. Despues di un total di kuater (4) CAB nos a konosé Regeringsraad (RR) na 1951 i despues, Raad van Ministers (RvM) na 1954. Tantu CAB, RR i RvM tabata suheto na konfiansa di un mayoria den parlamento (Staten). Manera nos sa, historia parlamentario no a start na 1954, sino na 1938. Nos promé elekshon pa Staten no tabata na 1954, sino desèmber 1937. E promé CAP a sinta riba 21 ougùstùs 1948 i tabatin komo tarea prinsipal pa organisá elekshon di 1949 ku pa di promé biaha a permití tur hende hòmber i hende muhé mayor di edat vota pa tur nan representantenan den Staten. Delaster un miembro di e promé CAP tabata nombrá pa e Gobernadó. Despues di e elekshon di 17 mart 1949 ku a keda ganá aki na Kòrsou pa Partido Nashonal di Pueblo (NVP), dr. Moises Frumensio da Costa Gomez a surgi komo e formadó di lokual mester a bira e di dos College van Algemeen Bestuur (CAB 2). PNP no por a yega na akuerdo ku e otro partidonan di Kòrsou ku a saka asiento pa forma CAB 2. Ta trata aki di Partido Demokrat (DP) i Partido Katóliko di Pueblo (KVK) ku a haña respektivamente 3 i 1 asiento. Promé ku CAB 2 a sinta, esaki a haña masha resistensia den Staten, prinsipalmente pa loke ta trata aprobashon di e ‘geloofsbrieven’ di e integrantenan di CAB 2. Tantu na Aruba komo Kòrsou, AVP i NVP respektivamente, a haña hopi krítika. Riba 10 di mei 1949 porfin CAB 2 ta sinta. Da Costa Gomez por a konta solamente riba sosten di 13 (di 22 miembro) lokual opservadonan for di un prinsipio a konsiderá komo insufisiente. E difikultatnan den Staten pa ku CAB 2 a kontinuá ku tur intensidat. Oposishon tabata hasi bida di CAB 2 práktikamente imposibel. Un miembro di oposishon, Sr. Gerharts, segun nótulonan di reunion di Staten di 9 yüni 1949 a kompará da Costa Gomez ku Adolf Hitler. Segun Gerharts Mein Kamf tabata ekibalente na Nos Lucha; Hitler-jugend tabata ekibalente na Gomez-jeugd i Braune Haus tabata ekibalente na Cas di Pueblo. No tabata un sorpresa ku despues di 37 dia, esta 17 yüni 1949, CAB-2 a kai. En bista di e turbulensia di CAB 2, Gobernadó a disidí pa pidi pa un ‘zakenkabinet’ ku a sinta riba 21 yüli 1949. Esaki bou di presidensia di e polítiko Rubiano Kwartsz ku por sierto a partisipá na elekshonnan di Staten di 17 mart 1949 ku Lijst Kwartsz, pero no a saka asiento.
Fuentenan adishonal: De Staatkundige Ontwikkeling der Nederlandse Antillen, dr. Kasteel; mr. dr. M.F. da Costa Gomez: Voorvechter voor de politieke emancipatie der Nederlandse Antillen, dr. Boeldak; Grondslagen en Scheidingslijnen, dr. da Costa Gomez.
Alex David Rosaria Blog 