NO TA ‘NAN KU NAN’, SINO NOS TUR

Palabra ta difísil despues di e asesinatonan ku a tuma lugá ayera na Kòrsou. Mi ta manda kondolensia pa famia i amigunan di e defuntunan. Mi tin hopi doló. Ta normal ku ta puntra unda nos ta bai i ta fásil pa tira falta riba e ‘otro’ sin kuestioná kiko nos a hasi o keda sin hasi ku a hiba nos aki. E kantidat ridíkulamente haltu di asesinato no ta djis un asuntu di violensia di gèng. Sea ku e asesesinatonan di ayera resultá di ta relatá ku gèng òf no, laga nos realisá ku ta un problema ku mester prekupá nos tur komo Yu di Kòrsou. E asesinatonan aki ta kousa un ambiente di miedu ku ta afektá hinter nos komunidat. E ta menasá progreso i tur avanse ku nos a konosé komo pueblo. E ta komprometé e kosnan ku ta hasi Kòrsou un perla den laman i ku ta pone nos bisa ku nos ta oruyoso di ta Yu di Kòrsou. No ta un kuestion di ‘nan ku nan’ pero un asuntu di nos tur. E no ta un problema ku Gobièrnu o un minister di Hustisia so por solushoná. Pa kolmo no ta eksistí un solushon di awe pa mayan.

Ta opvio ku nos mester invertí mas den kuerpo polisial, ekipo, teknologia ‘state-of-the art’ i hende pa ekipá esaki. Mester un protokòl pa pone tur aktor den e kadena hudisial traha i interkambiá inteligensia ku otro. Tin muchu divishon den i entre e diferente aktornan. Posiblemente un ‘team openbare veiligheid’. E kantidat di arma ku ta drenta nos pais mester ta un prioridat. Tampoko por laga e porta ku ta keda drei permitiendo e mesun hendenan drenta prison, sali, bolbe drenta, keda habrí.

Represhon ta importante, pero p’ami e aspekto prinsipal pa restablesé seguridat ta pa duna tur nos yunan speransa i akseso igual na oportunidat pa hiba un bida desente i kontentu. Nos mester krea un komunidat den kua tur hende por sinti ku nan potensial komo individuo i grupo ta alkansabel i ku esaki no ta un soño ku solamente un man yen di hende por realisá.

Nos mester di mas hende ku ta modelo pa nos komunidat. Polítikonan mester realisá ku banda di maneho i ser Parlamentario nan tin un deber ku nos hendenan pa tin un komportashon ku ta inspirá i no un di dekadensia. Religiosonan mester realisá ku si nan mes, hopi biaha ku inpunidat, ta faya ku lei, moral i nan vokashon, nan no por ta un ‘role model’ pa nos komunidat. I meskos ta konta pa nos organisashonnan di deporte, rekreo i soshal kaminda definitamente nos por hasi kosnan mihó. Laga nos ta sinsero i atmití ku nos a krea un isla di ‘nan’ i ‘nos’. Ta p’esei hopi hende den e kasonan di asesinato manera nos a konosé ta papia di ‘nan ku nan’. Mi sa, mi a tende un lider polítiko bisa meskos despues di e dòbel asesinato na Hato. Nos mester traha riba un komunidat di inklushon kaminda nos ta sòru ku no pasombra nos yunan ta bai tal skol, ta biba den tal bario, tin tal tipo di kabei, ta papia tal idioma, tin tal preferensia seksual o ta di tal religion o kredo, nan no ta konta. For di 1954 nos no a hasi sufisiente pa krea un bon sistema di edukashon, programanan soshal, un ekonomia ku ta krese i krea kupo di trabou. Pues laga nos no hunga wega polítiko ku e tragedia aki. I nos komo mayor tin un enorme tarea nos dilanti. Nos ta e piesa sentral. Nos mester ta e ‘role model’ prinsipal pa nos yunan ku nos komportashon i pa krea speransa serka nan. Nos komo mayor mester wak nos mes den spil i koregí nos komportashon. Laga nos hasi’é pa nan. Pa nan futuro. Pa nos pais.

 

 

 

 

 

 

 

 

 

 

Advertisement