DEKLARASHON DI BANKAROTA TA ROBES I MALIGNO

Un polítiko o mandatario di buena fe sa ku ora su pais ta bankarota esei kiermen ku no por paga pa importashon di merkansia i servisio, ku plaka den sirkulashon ta bira skars, ku e sistema bankario komersial ta kai den otro i finalmente ta yega na un situashon ku no tin konfiansa, ku gobièrnu no por paga su debenan (kompletamente). Pues un situashon sumamente penoso ku tin konsekuensia pa bo presupuesto, balansa di pago, ekonomia i empleo kondusiendo na fuga di kapital i prinsipalmente deterioro di e situashon sosial. Nos pais no ta bankarota. Ta remarkabel kon e arkitéktonan di “voodoo finance” a ninga ku nos tabata den un debakel finansiero ku a kondusí na un ‘aanwijzing’ di Ulanda na 2012, pero ku awor ta grita ku nos ta bankarota, miéntras nos no ta. Tambe ta normal ku un polítiko o mandatario di buena fe ta bringa pa su pais no keda deklará bankarota loke normalmente ta keda hasí dor di instanshanan internashonal i independiente manera Standard and Poor Moody’s i IMF. Aki, sin aparente sosten di Banko Sentral, Ministerio di Finansa, CFT i sektor privá ni institutonan internashonal, e Promé minister temporal ta sali deklará nos pais bankarota. Ta masha importante pa Staten den un reunion urgente yama tantu e Promé minister i minister di Finansa temporal, pa nan bin splika nos situashon. Ta importante ku ta tende opinion di entre otro nos ekspertonan finansiero di Banko Sentral, CFT, Ministerio di Finansa i tambe e Asosashon di Bankeronan Komersial. Tambe ta importante pa nos traha i yega na un ofensiva pa informá internasionalmente kiko a i ta pasa na Kòrsou. No por tin duda ku e lokual e minister a sali bisa ta devastador pa nos klima di invershon i desaroyo sosio-ekómiko, prinsipalmente pa e hòmber humilde ku ya kaba tin’e difísil. Atrobe nos ta mira kon devastador ta ora bo laga finansa den man di hendenan ku sa tiki di e materia aki.