KORTE TA SALBANDO NOS DEMOKRASIA

E último añanan a keda demostrá kon agradesido nos mester ta ku nos poder hudisial aki na Kòrsou. E no ta perfekto, pero por bisa – i pa ami ku sierto bergwensa – ku e ta é poder di nos trias politica ku mihó ta funshoná na nos bienestar general. Ku e kasonan den (i pendiente pa bai ) Korte, nos ta konkluí ku tantu e podernan legislativo (Parlamento), pero prinsipalmente e poder ehekutivo (Gobièrnu) a faya.
P’esei no por ta un sorpresa ku tin gruponan ligá ku mafia ku ya kaba ta bon penetrá i representá den Gobièrnu i Parlamento, ta hasi tur lokual ta posibel pa debilitá, susha i asta eliminá e sistema di Korte ku nos tin aktualmente. Nos por a tuma nota den e veredikto di Korte den Promé Instansia den e kaso di Babel, ku un casique di mafia na Italia ta lanta un partido polítiko aki na Kòrsou i pone su pòpchinan den Staten, Gobièrnu i instanshanan (semi) gubernamental pa asina sirbi e interesnan aya na Italia. E gruponan ligá ku mafia aki, huntu ku sierto partidonan polítiko ku ta sirbi interes di mafia te ainda, danki Dios, no a haña e manera pa tòrnu na nos poder hudisial. I komo pais, nos mester hasi tur lokual ta posibel pa esaki no sosdé.
Lagami remarká ku un pais nunka ta bai dilanti si solamente un (1) di e tres (3) patanan di su demokrasia ta funshoná. Pero, pa awor, ta nos poder hudisial ta skapa nos te ainda ku nos no a kai den e abismo di diktatura. Nos mester ta vigilante sinembargo pa e podernan ku ta skonde tras di independensia, pa asina kamuflá nan intenshonnan real. Esakinan ta entre otro kibra nos sistema hudisial meskos ku ta hasiendo ku Gobièrnu i Parlamentu. E gruponan aki lo no ke nada otro ku someté nos poder hudisial na mafia pa asina ei reina impunidat riba nos isla pa krimen, labamentu di plaka, froude di belasting i finansiamentu di terorismo. No ta un koinsidensia ku ta e mesun gruponan aki ta(bata) kontra di mas lei pa protehá nos sistema finansiero i medidadanan internashonal di sanshon.
Mi ta kere ku den e situashon aktual na promé lugá nos mester kuida nos poder hudisial. Mester renfors’é ku mas presupuesto, hende i ekipo. Den e kuadro aki nos mester di (mas) sosten i koperashon den Reino. Na di dos lugá nos mester ban traha duru pa krea konsientisashon den pueblo ku no ta kumbiní sigui sostené mafia. Pakiko? Pasombra na di promé lugá e pòpchinan ku mi a menshoná anteriormente no ta traha pa bo, nan ta traha pa mafia. Pues ora sierto partido parti stof, serbes ku kuminda, zundra Makamba i grita independensia, realisá ku esaki ta pa garantisá ku mafia i korupshon por sigui reina. I realisá ku no ta eksistí ningun pais ku a prosperá via korupshon. Realisá ku ningun pais a resolvé su problema di pobresa via mafia. Nos por kambia e rumbo aki ku nos voto 28 di aprel awor. Mientras tantu, ami ta gradesido i orguyoso di e trabou di nos Korte na fabor di nos demokrasia.