Ta di spera ku gobièrnu, eksperto i formadónan di opinion ta konsiente ku e ‘problema di karni’ ta simplemente un manifestashon di un problema mas grandi ku tin ke ber ku falta di regulashon, no-eksistensia di (sufisiente) standàrnan tékniko, sanitario, fito-sanitario, asuntu di importashon paralelo, dòbel OB ku a mata distribudornan, nos merkado chikí i solushon pa desperdisio di kuminda. Esaki ta esnan mas importante i mi no ta deskartá ku tin mas. E pió kos ku por hasi ta kere ku tanten nos tira tur produkto ku a pasa fecha, afó sin atendé ku e problemanan menshoná, ku tur kos ta ‘koek en ei’.
Mientras tantu nos ta importá outo di Hapon ku a keda eksponé na radiashon nuklear haltu despues di e desaster na Fukushima, outo di Merka ku ta téknikamente “afgekeurd”, aparatonan eléktriko ku no ta kuadra ku nos “cycle”, matanan dañino pa nos sistema ekológiko, aparatonan ku no ta kumpli ku standàrnan pa ku emishon di sierto gas, produktonan empaketá ku etikèt den idioma ku no ta pèrmitibel.
Nos por sigi. Pero mester ta kla ku si tin un kos ku nos no ta hasi, ta protehá nos hende, flora i founa di produktonan dañino. Loke nos mester no ta ‘road show’ ku kámara, ounke kòntròlnan mester sigi. Prinsipal ta ku nos ta wak e problema den tur su faseta ku e meta – sin stroba inneserariamente ekonomia i komersio – pa sòru ku nos hendenan, flora i founa no ta kore peliger ku por keda evitá dor di regla, regulashon i kòntròl. E tarea aki no ta imposibel. Paisnan mas chikí ku nos den Karibe ta muchu mas leu ku nos. Ta fásil pa papia solamente di karni. Ta mas difísil atendé ku tur faseta di e problema. Den polítika nos gusta skor, hunga popular miéntras hopi di e problemanan ku nos ta enfrentá por a keda resolvé ku un aserkamentu total dia nan a presentá. Laga nos no sigi ripití e fayonan di semper.
Alex David Rosaria Blog 