Den e artíkulo aki, 10-10-10 no solamente ta e fecha di nos status konstitushonal nobo, pero tambe e ta para pa e kontenido di e status. Na víspera di konmemorashon di e di 7 aniversario, mi ta konkluí un bia mas ku 10-10-10 a keda fundá riba un fundeshi defekto. Polítikonan a bende nos ku si sali for di e konstelashon di Antia Ulandes i bira Kòrsou outónomo, adelanto pa pueblo lo bin outomátikamente. Lo eliminá e buriku di karga i tur plaka di belasting lo keda akinan, garantisando bienestar.
Tabatin mandatario ku a mira 10-10-10 komo un remplasá “Antia Ulandes” pa “Kòrsou” den Statüt. No tabatin interes pa diskutí e struktura nobo di ámtenar, status di polítikonan sospechá i kondená pa sierto krímen, kalidat di nos demokrasia ni mehorashon di enseñansa ku ta e aspekto mas importante den desaroyo di un pais. A bai di akuerdo ku Ulanda su eksigensia pa krea un solo banko sentral pa Kòrsou i Sint Maarten apesar ku tur dos isla a skohe pa outonomia den maneho finansiero i makro-ekonómiko. Awe ainda nos ta usa un moneda di un pais ku no ta eksistí i ta mará den un union monetario sin kurso.
Echo ta ku esnan responsabel pa e desmantelashon tabata biba den nan mes mundu. Un mundu di pretenshon di éroe ku estatua i nòmber di kaya. No a traha riba e fundeshi, riba e kontenido. Un diferensia grandi por sierto tempu ku dr. Moises Frumencio da Costa Gomez (Dòktor) den añanan 40 a lucha pa nos outonomia. Dòktor, for di 1935 den su tésis ” Het Wetgevend Orgaan van Curaçao” i siguidamente den un seri di diskurso detayadamente a plantea e base filosófiko di e status konstitushonal nobo ku a drenta na vigor na 1951 (Interimregeling) i 1954 (Statuut).
Awe nos ta paga e preis haltu pa un kambio konstitushonal sin un fundeshi fuerte. Nos ta puntra unda e bienestar outomátiko a keda? Despues di 7 aña nos mester akseptá ku kambio konstitushonal so, no ta trese adelanto. Adelanto ta bin ku trabou duru i prinsipalmente ku kurashi pa tuma e desishonnan nesesario, apesar ku nan ta polítikamente impopular.
Mester stòp di kere ku ta otronan lo salba nos. Nos historia a demostrá ku e kerementu den milager manera Guandong Zhenrong, Sambil, 80/20, PDVSA, BOO, un tratado fiskal ku Merka, Texas Instruments no ta trese desaroyo duradero. Laga nos pone dilanti ku ta nos ta e proménan responsabel pa nos bienestar. Nos mester ta konsiente ku bienestar nunka a surgi diripente òf outomátiko. Laga nos drecha kalidat di e hendenan ku nos ta skohe pa representá nos i eksihí hende kapas ku no ta bolbe gaña ku nos problema ta asuntu di sistema di gobernashon o konstitushon.
Alex David Rosaria Blog 