A ninga dera Dòktor den santana katóliko

 

Riba 22 di novèmber, 2017 ta kumpli 51 aña ku e gran estadista mr. dr. Moises Frumencio da Costa Gomez (Dòktor) a muri na edat di 59 aña. Poko konosí ta ku iglesia katóliko a nenga retundamente pa dera Dòktor -un katóliko-  den un santana katóliko. A dera Dòktor den santana protestant na Otrobanda. Na su entiero dominé Meerberg a resa:

Ziet, een koning zal regeren in gerechtigheid, en de vorsten zullen heersen naar recht.
En die man zal zijn als een verberging tegen den wind, en een schuilplaats tegen den vloed, als waterbeken in een dorre plaats, als de schaduw van een zwaren rotssteen in een dorstig land.
En de ogen dergenen, die zien, zullen niet terugzien, en de oren dergenen, die horen, zullen opmerken.
En het hart der onbedachtzamen zal de wetenschap verstaan, en de tong der stamelenden zal vaardig zijn, om bescheidenlijk te spreken.

E echo ku a ninga di dera Dòktor den un santana katóliko a kousa konsternashon. E iglesia a bisa ku e negashon ta pasombra e defuntu a kasa, parti i bolbe kasa. Konosedónan sa sinembargo ku e aktuashon aki tabata unu netamente polítiko i no religioso. Dòktor huntu ku Monseñor Verriet a lanta e poderoso Curaçaosche Rooms Katholieke Partij, CRKP na 1935 (ku no ta KVP manera hopi ta bisa) ku a gana e promé dos elekshonnan pa Staten na 1938 i 1942. Na 1944 Partido Demokraat ta lanta i den e siguiente elekshon ta gana di CRKP. Esaki a pone ku Dòktor kier a modernisá CRKP dor di e.o. redusí e influensia di iglesia katóliko den CRKP. Esaki no a kai den bon tera serka e iglesia i a pone ku eventualmente Dòktor a bai ku su asiento i lanta Nationale Volkspartij (NVP). CRKP a desaparesé i e iglesia nunka a pordoná Dòktor, ni despues di su morto.

Un dia promé ku konmemorashon di 100 aña natalisio di Dòktor riba 26 di òktober 2007, Pader Amado Römer den su predikashi den katedral di Santa Ana a pidi pordon pa e manera ku su amigu a keda tratá. No ta konosí si Pader Römer a papia na nòmber di su iglesia òf komo persona.

Na 1997 a saka e restonan di Dòktor for di e santana protestant na Otrobanda i a hiba esakinan pa Bottelier, un santana katóliko, pero ku no ta kai bou di régimen di Obispado.

Pas eterno na e mas ilustre emansipadó polítiko di nos pais.

Thimphu, Bhutan