Algun dia despues ku e miembronan di Staten a sinta riba 2 novèmber 2012, urgentemente lidernan di frakshon a keda yamá pa un reunion. Na e momento ei e gobièrnu nobo no a sinta, no tabata konosí ken ta koalishon i kende oposishon. E promé punto tabata pa proponé un kandidato pa Presidente di Staten ku despues di algun siman lo a baha pa traha lugá pa Marcolino Franco. Ora mi a kera ku e otro punto(nan) lo ta ‘aanwijzing’ o futuro di refeneria mi a keda babuká di tende ku tabata trata di un invitashon di Parlatino pa un biahe. Mi tabata e úniko lider di frakshon ku a vota kontra. Mi no a mira e relevansia ni urgensia.
Promé ku sigui ta bon pa tira un bista atras. For di den komienso di añanan 80, Antia Ulandes a hasi tur esfuerso pa bira miembro di Parlatino ku a forma na 1964. Den un reunion di Parlatino ku a tuma lugá na Bogotá den febrüari 1981, Miembro di Staten Roy van Putten ku a bai ‘lobby’ kuriosamente a bisa: “E úniko relashon ku Antia tin ku Ulanda ta e idioma Ulandes. Pero nos no ta papi’é boluntariamente, sino fòrsá”. Van Putten a kontinuá: “E Antiano di orígen Arubano, Boneriano i Yu di Kòrsou tin kontakto estrecho ku Latino Amérika pa motibu di historia, kultura i deporte. No tin ningun Antiano riba e tres (3) islanan ku no ta papia Spañó, adorá e mesun santunan, baila i kanta e mesun müzik”.
Ni e diskurso aki ni otro esfuersonan ku a sigi no a yuda. Parlatino na 1988 ta manda informá Antia Ulandes ku a rechasá e petishon pa miembresia permanente. Esaki a konsiderá ku un pais no-independiente no por a bira miembro. Apesar di e desapunto, Antia Ulandes no a entregá i despues di hopi kombensementu, Parlatino a akseptá nos komo miembro permanente na 1990.
Nos pais tin pues un historia largu ku Parlatino. E pregunta ta keda ki relevansia e relashon aki tin pa bida di e suidadano aki na Kòrsou? Ta masha normal ku despues di x tempu ta evaluá miembresia na organisashonnan regional. Algun aña pasá Gobièrnu (kier) a evaluá nos miembresia ku Association of Caribbean States. Pakiko no ta evaluá nos miembresia na Parlatino? Esaki sigur en bista di e miles di florin ku nos ta paga anualmente pa miembresia i e biahenan kostoso pa tur tipo di reunion. Staten ku semper tin boka yen di kontrolá Gobièrnu no mester tin miedu pa laga kontrolá su mes. Esaki sigur en bista di hopi reklamo den pueblo, no awe, pero hopi aña kaba pa loke ta Parlatino.
Den kuater aña nunka ami a biaha pa reunionnan di Parlatino. Mi no a mira e relevansia. Di otro banda mi no por a kombensé un mayoria pa sikiera evaluá nos partisipashon na Parlatino. Parlatino a para bira un derechi atkerí di e Miembro di Parlamento pa biaha. Mester bin un kambio.
Willemstad, Curaçao
Alex David Rosaria Blog 