Kòrdando e promé elekshon Konseho Insular

Ta 67 aña pasá riba 4 yüni 1951, ku pa di promé biaha nos a vota i skohe nos representantenan di Konseho Insular di Kòrsou. Hopi hende te ainda inkorektamente ta bisa ku nos a haña outonomia na 1954, miéntras ku esaki a tuma lugá for di 1951. Ta bon pa nos repasá un ke otro, pero promé ku esei, algun detaye di e elekshon históriko kasi 7 dékada anterior.

Un total di sinku (5) partido a partisipá. Nationale Volkspartij (NVP) ku Moises Frumensio da Costa Gomez (Dòktor) na kabes; Demokratische Partij (DP) ku Efrain Jonckheer komo lider; Katholieke Volkspartij (KVK) ku David Capriles na kabes; Curaçaose Onafhankelijke Partij (COP) liderá pa Phillip Evertsz i finalmente Partij van de Arbeid (P vd A) bou di liderasgo di Castelar da Costa Gomez.

NVP a saka 9 asiento, DP a saka 8, KVK 3 i COP a saka 1. P. vd A no a logra sufisiente voto pa asiento. Remarkabel ta ku 85% di esnan ku por a vota, a bai vota. Algun di e miembronan di e promé Konseho Insular tabata Tjark Petzoldt, Romano Marcario Tschumie, Heraclio Henriquez, Aloisio Emilio Panneflek, Edward Broos, Juancho Evertsz, Hendrik Pieters Kwiers i Moises da Costa Gomez. Nos promé Konseho Insular tabata konosí pa e kantidat grandi di miembronan ku un tras di otro tabata baha pa otro subi.

Konseho Insular a bira posibel ku kambio di nos konstitushon na 1950. Esaki a hasi posibel ku na 1951 a introdusí responsabilidat parlamentario kompleto, a bin ku Eilandenregeling Nederlandse Antillen (ERNA) den kua a desentralisá tareanan manda teritorionan insular. Riba 2 di yüli 1951, e promé Konseho Insular ta keda instalá den e sala di reunion di Staten, 3or di atardi den un reunion emoshonante.

Emoshonante pasombra miéntras tur otro isla di Antia Ulandes pa mas di 100 aña tabatin un tipo di konseho insular kolonial riba nan isla i ku por a skohe pa nan representantenan, ounke ku hopi limitashon, ta na Kòrsou so esaki no tabata posibel. Den pasado e poder kolonial semper a haña ku si riba e mesun isla bo tin tantu gobièrnu sentral pa tur e seis islanan komo pa e isla di Kòrsou tambe, ku esaki lo trese bruashon. Mester bisa ku pa un periodo kòrtiku (1828-1833) a eksperimentá ku un ‘Gemeente Bestuur Curaçao’. Esaki a frakasá pasombra konstantemente tabatin konfliko entre di Gemeente Bestuur i Fort Amsterdam. Ku e elekshon riba 4 yüni 1952 a bin un fin na e diskriminashon ku Kòrsou a sufri di dje kompará ku e otro 5 islanan. Esaki tabata e inhustisia ku Généreux de Lima, un di e tatanan di nos demokrasia i e promé hòmber di koló den Koloniale Raad, a protestá kontra di dje pa di promé biaha na 1863.

Willemstad, Curaçao

Advertisement