2 di yüli ta un dia históriko. Riba e dia aki na 1951 nos ta marka komienso di gobernashon propio. Kontrali na lokual hopi ta keda ripití sin buska drechi, outonomia no a kuminsá na 1954 ku firmamentu di Statüt, sino ku introdukshon di un konstitushon nobo, yamá Interimregeling riba 7 febrüari 1951. Basá riba e kambio konstitushonal aki, nos promé Konseho Insular a sinta, despues di elekshon riba 4 di yüni 1951 spesialmente pa skohe e representantenan pa e órgano nobo. Pues 2 di yüli ta mas ku solamente Dia di Bandera. E ta selebrashon di 67 aña di gobernashon propio.
E promé elekshon pa Konseho Insular a konosé e siguiente resultado: Partido Nashonal (NVP) ta gana elekshon ku 9 asiento, Partido Demokrat (DP) ta saka 8, Partido Katóliko di Pueblo (KVP) ta saka 3, Partido Independiente di Kòrsou (COP) ta saka 1, i Arbeiderspartij (AP) mihó konosí komo ‘Partido Warawara’, no ta saka ningun hende. AP a sali for di miembronan malkontentu di DP i ta risibí solamente 148 voto. E nòmber ‘warawara’ a keda duná na AP pasombra segun un pamfleta di DP di e tempu ei, warawara ta konosí pa su holó stinki.
E promé 21 miembronan di Konseho Insular di Kòrsou. Pa NVP: Sr. Hendrik Pieters Kwiers, Sr. Ernesto Rozendaal, Sra. Angela de Lannoy-Willems, Sr. Benjamin Römer, Sr. Philip Cohen Henriquez, Sr. Edward Broos, Sr. Romano Tschumie, Sr. Heraclio Henriquez i Sr. Charles Voges. Pa DP: Sr. Efraim Jonckheer, Sr. Ciro Kroon, Sr. Ramez (Ronchi) Isa, Sr. Steef v.d. Meer, Sr. Cornelis (Nene) Hueck, Sra. Louisa Van der Linde-Helmijr, Sr. Julio Rosario i Sr. Tjerk Petzoldt. Pa KVP: Sr. David Capriles, Sr. Elias Morkos i Sr. J. ‘Jonchi’ Jonckhout. Pa COP: Sr. Philip Evertsz.
E promé diputadonan di Kòrsou tabata: Sr. J. (Jonchi) Jonkhout (KVP), Sr. Philip Cohen Henriquez (NVP), Sr. Ciro Kroon (DP) i Sr. Gerald Sprockel (NVP).
S.E. Gobernador Anton Struycken a hasi e apertura ofishal di Konseho Insular riba 2 yüli 1951 durante un reunion solèm ku a tuma lugá den edifisio di Staten di Antia Ulandes. Den su diskurso e a bisa ku: “Een eigen orgaan voor de behartiging van zijn belangen schept voor Curaçao grotere mogelijkheden dan ooit tevoren om de lens scherper in te stellen op de eigen problemen en mogelijkheden”.
Sr. Michael Gorsira, e promé Presidente di Konseho Insular di Kòrsou, a resumí e importansia di gobernashon propio na final di su diskurso splikando den idioma Papiamentu: “Laga nos tur rekordá ku di awor en adelante nos lo haña e gobièrnu ku nos mes trese na poder i ku nos mes lo mester karga tur responsabilidat pa tur e loke e gobièrnu aki hasi. Laga nos demostrá responsabilidat. Esei lo ta e mihó prueba ku nos por duna ku nos meresé e outonomia ku tantu nos a anhelá”. Historia pues ta mustra ku Sr. Gorsira a na Papiamentu na 1951 den Konseho Insular!
E arkitekto di nos gobernashon propio indudablemente tabata mr. dr. Moises Frumensio da Costa Gomez ku inkansablemente a lucha pa nos outonomia for di dia ku e a regresá su isla natal riba 31 desèmber 1934 despues di a optené su título universitario na Ulanda. E mes no a tuma asiento den Konseho Insular riba 2 di yüli 1951 (e a hasi esaki mas despues) pasombra e kier a konsentrá su mes riba
perfekshoná nos status konstitushonal ku a resultá den nos Statüt.
Yerevan, Armenia
Foto: Nationaal Archief
Alex David Rosaria Blog 