Den un reunion di Staten di Antia Ulandes riba 30 yüni 1950, un moshon a keda entregá pa frakshon di Arubaanse Volkspartij (AVP) pa baha e Minister Plenipotensiario na Ulanda, Sr. Michael Gorsira. Segun e miembro pa AVP, Sr. Geerman, e no tabatin konfiansa den e Minister Plenipotensiario ni tampoko den su kapasidatnan pa representá Antia.
Rason pa e deskonfiansa tabata segun AVP e echo ku Sr. Gorsira tabata komportá su mes komo un partidario di Democratische Partij (DP) i ku e no tabata na altura di e berdadero deseonan di kada isla pa loke ta trata struktura estatal. Segun Sr. Geerman, Sr. Gorsira lo a hasi deklarashonnan indebido na Ulanda bisando e.o.: “Staten di Antia Ulandes no ta representativo”.
Miembro di Staten pa Katholieke Volkspartij (KVP), Nicolaas Debrot, a sali na defensa di Sr. Gorsira i a yama e moshon: “.. een prul, je reinste kolder en ongemotiveerd.” E a kòrda AVP ku e posishon di un Minister Plenipotensiario no ta polítiko sino unu netamente atministrativo pa kua Gobernadó ta responsabel. Lider di DP, Sr. Jonckheer, a bisa ku Sr. Gorsira no tin nada di haber ku DP i ku no por tin kuestion di partidismo.
Algun dia despues, na momentu ku mester a trata e moshon, hopi miembro a bandoná e sala di reunion di Staten ku konsekuensia ku no tabatin korum pa votashon. Mester remarká ku e susesonan rònt di Sr. Gorsira a tuma lugá den un periodo sumamente tumultoso den nos demokrasia parlamentario. Na Kòrsou e rivalidat entre di Dòktor da Costa Gomez i Efraim Jockheer tabata kandente i oposishon di e otro islanan pa ku Kòrsou tabata hopi visibel te na e ekstremo ku tabata kompará Dòktor ku Hitler.
Pa loke ta trata Sr. Gorsira, esaki a bisa ku Staten no tin nada di bisé. “Mijn positie is geen andere dan die van een ambtenaar. Ik ben door de gouverneur benoemd en ben alleen aan hem verantwoording verschuldigd. Men kan een ambtenaar van wat men zou kunnen noemen de diplomatieke dienst nu eenmaal niet in een parlement wegstemmen.” Sr. Gorsira ta keda den su posishon te ora e keda nombrá na 1951 komo e promé Gezaghebber di Kòrsou.
E kaso di 1950 ta kasi idéntiko na e kontroversia ku e Minister Plenipotensiario durante di e gobernashon 2012-2016. Konstitushonalmente Staten no por kore ku un ámtenar, tampoko e representante na Ulanda. Na 1950 Gobernadó ku ta esun ku a nombra Sr. Gorsira a opta pa no kit’é. Durante 2012-2016 esun ku ta responsabel pa e Minister Plenipotensiario, e Minister Presidènt, tampoko a opta pa tuma medida.
Willemstad, Curaçao
Fuente: Het Nieuws: Algemeen Dagblad, 5 juli 1950; Amigoe di Curaçao, 11 juli 1950; Historisch Archief Curaçao
Alex David Rosaria Blog 