Den kurso di añanan polítikonan semper a (laga nos) kere ku nos problemanan ta falta di e struktura gubernamental. Si no tabata Nieuwe Unie, ta UPG, LGO+, Mankomunidat, Provincie, Antia Restrukturá i Nieuwe Antillen ku mester a resolvé tur kos. Mi ta sigur ku mi lista ta inkompleto. Ami semper a gusta loke e Presidente di Koloniale Raad a bisa promé ku esaki a desaparesé na aprel 1938 pa traha espasio pa Staten: “E kalidat di hende pa manehá e struktura ta mas importante ku inventá un struktura gubernamental ku bo ta kere ta perfekto”.
E artíkulo aki ta memorá un kambio estatal kurioso ku sierto polítiko di Kòrsou a proponé medio siglo pasá, pero ku ni historiadónan a lanta for di tera.
Despues di e susesonan di 30 mei 1969 ku a pone ku Gobièrnu di Antia a baha, a organisá elekshon nobo riba 5 sèptèmber 1969. A surgi un kombinashon di lista di tres partido (promé biaha den nos historia) konsistiendo di Partido Radical di Pueblo (PRP), Akshon Sosial Progresista (ASP) i Union Sosial Kristian (CSU) ku e siguiente lista: 1. Leoncio Yanez; 2. Eric Vinck; 3. Wilson Mariën; 4. Hermigildo de Palm; 5. Virginia Martina; 6. William Reet; 7. José Veeris; 8. Ostacio Winklaar; 9. Carlos Goeloe; 10. Elias Bronswinkel; 11. John Riley.
PRP-ASP-CSU via di su bosero, Sr. Bronswinkel, komo punto di lansa kier a eliminá e asientonan den Staten di Boniero i Islanan Ariba. E tabata haña ku Boneiru i Islanan Ariba no tabatin e peso pa tin asiento i voto den nos parlamento. E a proponé pa e dos nan aki tin solamente un “adviserende stem”. Mas a leu PRP-ASP-CSU a proponé pa mas outonomia i mas responsabilidat pa Aruba i Kòrsou mientras ku e tres teritorionan di Isla Ariba i Boneiru mester a bira mas dependiente di Aruba i Kòrsou. Segun Sr. Bronswinkel, eliminando e asientonan di Staten di Boneiru i Isla Ariba ku tabata stroba gobernashon, lo a pone ku nos pais porfin por a keda bon goberná.
Polítikonan di Isla Ariba i prinsipalmente di Boneiru a kaba ku e proposishon aki. Den esaki polítikonan a hasi bon uso di e echo ku Sr. Bronswinkel tabata pancho di karnaval na 1964 i ku e tabata yama su mes un spiritista ku por a papia ku defuntu a hasi bofón di tantu e proposishon di kambio estatal komo e bosero di e plan.
PRP-ASP-CSU a haña un total di 1,023 voto ku no tabata sufisiente pa saka un asiento den Staten. Ku esaki tambe e plan pa Boneiru, St. Maarten, St Eustatius i Saba bira dependiente di Aruba i Kòrsou, sin representashon den Staten, a pasa pa historia.
Willemstad, Curaçao
Alex David Rosaria Blog 