Heredero di Dòktor su trabou

Moises Frumencio da Costa Gomez, a nase 111 aña pasá riba 27 òktober. E mucha di Ser’i Klip, Otrobanda, mihó konosí komo Cheche Bikker (ta despues di basta aña e a haña e fam da Costa Gomez di su tata) ku a bai skol di pòrnada i a kolekshoná piedra di koló den su hubentut. E Yu di Kòrsou ku a dòktorá na Ulanda i keda (at)mirá semper di su bida komo Dòktor i a dediká su bida pa kibra barera pa tur yu di tera.

Sin Dòktor lo no tabatin derechi di voto universal na 1948. Sin Dòktor outonomia interno lo no tabata posibel for di 1951. Banda di esakinan, Dòktor tabata e polítiko mas popular den nos historia hañando 36% di tur voto na 1963. Mi no ke para ketu solamente na e hechonan di pasado, sino mas bien e kaminda di emansipashon i demokrasia ku e a deseá pa nos kana.

Na momentu ku Dòktor a akseptá Statüt na yüli 1954, ela bisa ku “Statüt no ta pa semper. Esaki ta e promé mitar i pronto lo bin p’e di dos mitar”. Segun Dòkter pueblo mester mustra ku e por dirigí su mes” (Boletin Oficial di Gobiernu di Corsou, 19 december 1966). Esaki kier men prinsipalmente karga responsabilidat propio. 

Pa nos ku ta konsiderá nos mes heredero di e trabou di Dòktor, ta bon pa rechasá kompleho, ideanan populista i asta rasista ku un grupo kier asosiá ku emansipashon. Emansipashon no tin ke ber ku sembra rabia riba otro pais(nan) o tipo di hende. Emansipashon no tin ke ber ku buska independensia pa djis pa nos hasi i deshasí, aktua iresponsabel i deskabeyá sin ku otronan por hala nos atenshon.

Emansipashon, esun ku Dòktor a para p’e, tin ke ber ku empoderashon di e hende, amplia su konosementu i eskoho. Emansipashon di Dòktor ta para pa alsa e kalidat di hende ku ta manehá nos gobernashon, institushonnan (demokrátiko) i introdusí mas ‘checks and balances’. Ehèmpel ta un Korte Konstitushonal ku Dòktor a proponé den De Proeve van een Grondwet voor Curaçao (1946). T’esaki ta e fórmula pa bo yega na un pueblo digno, orguyoso ku ta kapasitá pa alkansá su potensialnan. 

Komo Gomista mi deseo ta pa nos hasi di nos parti i komplementá Gomez su trabou.

Istanbul, Turkey