Moises Frumensio da Costa Gomez (Dòktor) a bai laga nos riba 22 novèmber 1966 miéntras ku e tabata prepará pa bai un sita serka su dentista, 9or di mainta. Su kasá, Lucina da Costa Gomez, ku a sali for di e kamber kaminda e tabata huntu ku Dòktor, a bin despues di algun ratu i hañ’e den un stul morto. E lo mester a sinti su kurpa derepente bira malu i disidí di sinta un ratu.
E notisia di su fayesementu tabata un sorpresa grandi. Algun dia promé ku e fecha aki Dòktor a regresá kas for di un estadia di 5 siman den hospital St. Elisabeth relashoná ku problemanan ku pulmón. Dòkternan a konsiderá ku Dòktor a rekuperá sufisientemente i ku e por a bai kas i resumí su tareanan. Dòktor a fayesé di problema ku kurason.
E mainta ei Dòktor tabatin yen di ánimo pa despues di su sita prepará un reunion ku su partido, Partido Nashonal di Pueblo, pa atendé ku un halá di problema di índole polítiko. Algun luna promé PNP a sufri un derota elektoral kontundente. Tambe Dòktor tabata den bataya ku su mes partidarionan ku tabata di opinion ku e no tabata habrí pa ideanan nobo. Anteriormente un grupo di Nashonalista a bandoná PNP i a lanta Union Reformista Antillano (URA). Banda di esaki tabatin no ménos ku tres fakshon diferente entre nan un grupo ku a forma Acción Social Progresista (ASP).
Dòktor a bai laga nos despues ku apenas un luna promé e a kumpli 59 aña. Dòktor, e emasipadó polítiko di mas grandi ku nos a konosé, a laga un fundeshi sólido pa nos sigi konstruí i perfekshoná nos demokrasia. Kisas e mihó lès ku Dòktor a laga atras ta ku outonomia ta floresé dor di prepará nos mes, bon gobernashon, sentido di responsabilidat i koperashon ku otro. Hunga víktima, kulpa tur otro hende, populismo i mal gobernashon ta kontra di bienestar general i final di kuenta ta mina nos outonomia.
Belgrado, Serbia
Alex David Rosaria Blog 