Ban ta franko ku nos mes

 

E peliger mas grandi aktualmente ta nos inabilidat pa goberná nos mes i atendé nos asuntunan na drechi lokual ta hasi imposibel pa hasi bon uzo di nos potensial. E situashon aki no a bin den un ‘drumi lanta’; e simiñanan a keda plantá hopi tempu pasá den nos institushonnan i nos ser.

Nos ta keda vota pa kandidatonan kuestionabel ku sero kalifikashon pa goberná, ku partidonan polítiko ta tira den nos skochi. Nos ta preferá keda gañá ku kuentanan di ada i promesanan ku lo no tin medida ounke kon malu e situashon ta pasombra polítikonan sa ku kombersashon franko tokante nos debilidat i fayonan no ta produsí voto manera si ta e kaso ku ser populista. 

Pero no ta solamente polítika. Ta imposibel avansá ora prensa ta pusha nos ku notisia falsu i tendensioso na lugá di informashon konfiabel. Tampoko por buska guia moral di iglesianan ku ta dal tur tipo di buèlta pa tapa abuzo seksual di nan religiosonan. Nos ta sera wowo pa nos hábitonan insaludabel ku ta kondusí na malesanan króniko, adikshon na wega di plaka, prostitushon, ensèst, violensia relashonal i kontra animal. Mientras ta reklamá diskriminashon risibí, nos mes ta diskriminá otronan pa motibu di nan preferensia seksual, status ekonómiko òf orígen. Un chin chan kos nos ta hunga víktima, referí na sklabitut enbes di atendé ku e demoñonan di nos pasado i asumí responsabilidat. 

No ta un sorpesa ku nos ta biba di krisis pa krisis, defendé kos robes, premia polítikonan kriminal, kaba ku nos mes akadémikonan i despresiá tur hende rònt di nos ku ta eksitoso. Nos problema ta mas ku tur kos unu di ìndolé sosial. E no ta Den Haag, nos sistema demokrátiko, CFT òf ku nos ta un pais yòn. Kòrda ku durante e mesun periodo ku nos demokrasia ta eksistí paisnan manera Irlanda, Korea, Mauritius, Singapore a bini for djatras i progresá.

Nos mester un spil dilanti nos mes. Nos mester ta franko ku nos mes. Si nos rekonosé esaki, e proseso largu i arduo pa trese kambio por start. No tin solushon mágiko. Mester planifikashon, trabou duru, strukturanan modèrno polítikonan kapas i onesto i tambe guia moral pa asina nos produsí un kapital humano ku ta mas felis, sigur di su mes i globalmente kompetitivo. Ya nos konosé e resultado di sera wowo pa realidat, keda pegá den pasado i akusá otronan pa nos situashon.

Willemstad, Curaçao