Promé ku Partido Demokrat (DP) a lanta na 1944, dr. Moises da Costa Gomez (Dòktor) ku su partido, Curaçaosche Rooms Katholieke Partij (CRKP), a gana e promé dos elekshonnan (1937 i 1941). Despues ku DP a surgi, e posishon konfortabel di Dòktor a kaba. DP tabata organisá enkuentronan polítiko elektrisante ku müzik i bebida lokual tabata atraé e masa. Mi tio grandi, John Martis, tabata hür ekipo di zonido i bende limonada, malta i serbes pa e Krachinan. Dòktor di otro banda tabata obligá di sigi reglanan di Iglesia Katóliko i mayoria biaha mester a tene su enkuentronan den kurá di misa, sin müzik, sin bebida stèrki.
DP tambe tabata ‘score’ ku su revista Democraat fulminando kontra di establesimentu i prinsipalmente e korant katóliko Amigoe di Curaçao ku nan tabata akusá di ‘fake news’. Na 1946 e revista a kousa konsternashon dor di pone un ‘vakatura’ pa “un Sukarno pa Kòrsou”. Sukarno a hiba Indonesia na independensia i tabata outokrátiko, nombrá presidente pa bida largu te na momentu ku un golpi di estado a bah’é. Hefe di redakshon di Democraat a keda interogá pa Kuerpo di Polis. Despues DP a nuansá: “Weest gerust. Soekarno’s komen niet af op advertenties. Soekarno’s spruiten voort door omstandigheden. Wij hopen van harte dat de omstandigheden [hier] nooit van dien aard zullen zijn dat zij een Soekarno voortbrengen.” (De West, 18/4/1946).
Despues di algun aña, Democraat a bolbe shòk nos isla ku un otro anunsio. Den su edishon di mei 1949, Democraat a saka un aviso ku ta bisa ku e palasio di Gobernadó ta na benta. Opviamente DP indirektamente ta bisa ku mester eliminá e posishon di Gobernadó i bende su palasio. Pa pone esaki den konteksto, nos mester kòrda ku for di e promé Konferensia di Mesa Rondó na 1948 e posishon di Gobernadó den nos konstelashon tabata un batata kayente ku a pone DP bandoná sala di RTC i despues bai keha serka un organisashon multilateral. Dòktor sinembargo semper a insistí pa resolvé e disputa ku Hulanda via negosashon.
Na mart 1949, Dòktor su partido nobo, Partido Nashonal di Pueblo (PNP) ta gana elekshon. Na 1954, DP ta pèrdè elekshon pero ta laga e ganadó, PNP, afó i ta forma koalishon ku e otro islanan. Riba 15 desèmber e aña ei mes, e titular di DP, Efraim Jonckheer, ta firma Statüt ku e provishonnan pa Gobernadó manera e arkitekto Dòktor a akordá.
San Diego, California (USA)
Alex David Rosaria Blog 