Siman pasá e Komishon di Dekolonisashon di Nashonnan Uní a reuní na Grenada riba e falta di progreso di dekolonisashon pa ku e 17 teritorionan no-independiente* riba e lista di Nashonnan Uní (UN). Den 29 aña solamente un (1) a bira independiente, mientras ku un (1) teritorio a keda agregá na e lista, pues un resultado nèto di sero.
Ta remarkabel ku na Grenada, ni Kòrsou ni Statia tabata riba agènda. Esaki mientras ku resien algun grupo ku basta bochincha a manda karta pa UN i/o mester a bishitá e organisashon aki pa denunsiá Hulanda i nos kuadro konstitushonal.
E hendenan aki mester tuma bon nota i no keda riba e kaminda robes manera mi a atvertí basá riba mi eksperiensia trahando pa UN (https://alexdavidrosaria.blog/2018/02/07/st-eustatius-barking-up-the-wrong-tree/). Mester realisá ku Statia ku aktualmente ta bou di kuratela, su situashon ta unu netamente interno di Ulanda i no tin ke ber ku UN. Statia a firma pa bira munisipio (speshal) Hulandes. Ademas, Staia ta bou di kuratela pa motibu di maneho desastroso di su asuntunan públiko.
Esnan ku ta boga pa sali for di Reino, mester kòrda ku ni Hulanda ni UN por impedí Kòrsou bira independiente. Tampoko bo mester ta riba e lista di dekolonisashon pa bira independiente. E paisnan ku a bira independiente mas resien, South Sudan (2011) i Kosovo (2008) nunka tabata riba e lista. Pa kambia nos status, mester kombensé un mayoria di pueblo. I bo ta hasi esaki ku gobernante i gobernashon na drechi i na serio ku por pone e pais aki para stabil riba su pianan. Mi tin miedu ku un grupo ke independensia no pasombra esaki ta un ideal noble, pero pa nan (sigi) hasi i deshasí. P’esei mester bin lihé ku un lei di rèferèndum (https://alexdavidrosaria.blog/2018/11/19/referendum-yes-but-not-without-a-referendum-law/). Independensia manera ami i otronan a soña na 2005, ta mes leu ku nunka.
Willemstad, Curaçao
*American Samoa, Anguilla, Bermuda, British Virgin Islands, Cayman Islands, Falkland, French Polynesia, Gibraltar, Guam, Montserrat, New Caledonia, Pitcairn, Saint Helena, Tokelau, Turks and Caicos, US Virgin Islands and Western Sahara.
Alex David Rosaria Blog 