Despues ku anunsiá un referèndum lo traha lei di referèndum?

Un partido polítiko Hulandes aña pasá a opiná ku Kòrsou mester por bira independiente sin konsultá pueblo. Tin grupo den nos komunidat ku ke un referèndum riba nos status estatal pasombra segun nan e refèndum di 2009 (den kua e opshon ‘si’ a gana) no tabata limpi. Polítikonan ta kulpa Hulanda pa e mal maneho di nos isla i ta bende e idea emoshonal ku Hulanda ta e enemigu i ku independensia ta nos salvashon. Di otro banda, den relativo silensio, algun ta traha pa Kòrsou bira un provinsia i/o un teritorio ultramar, UPG.

Ku tur e papiamentu tokante di kambio di struktura i referèndum, ta inkomprendibel ku tiki hende ta prekupá ku nos no tin lei di referèndum pa atendé ku esensia di e asuntu aki. Ken ta determiná ku lo tin referèndum? Gobièrnu, Parlamento òf un petishon di suidadanonan? E resultado di un referèndum lo ta un konseho òf un mandato? Kua ta e mínimo di voto bálido pa un referèndum ta legítimo? E porsentahe nesesario pa un kambio estatal mester ta 50% òf 66% òf 75%? E porsentahe ta kambia dependé e tema di referèndum? Ta laga hende di 16 aña tambe partisipá. Personanan sin nashonalidat Hulandes pero ku un kantidat di aña legalmente residensiá aki por partisipá?

Nos ‘track record’ ku asuntunan ku pa lei no ta bon reglá ta papia pa su mes. Nos a mira resientemente kon ta hasi maluso di falta di lei òf burakunan den lei pa burla di nos fundeshinan demokrátiko. E último kos ku nos mester ke ta un referèndum estilo parotin riba un asuntu asina importante manera kambio konstitushonal. E pregunta pues ta keda: Kiko nos ta warda pa bin ku un lei di referèndum? Despues ku anunsiá ku ta bin un referèndum?

Willemstad, Kòrsou