Kon iglesia a kaba ku KVP pasombra esaki a traha ku DP

Katholieke Volkspartij (KVP) a lanta na 1948 ora dr. Moises da Costa Gomez (Dòktor) a bandoná Curaçaosche Rooms Katholieke Partij (CRKP) ku e i Mgr. Verriet na nòmber di Diósesis di Willemstad, a funda na 1935. CRKP pues no ta KVP manera hopi ta pretendé. For di 1945 tenshon entre Dòktor i Diósesis tabata brota. Iglesia tabata kontra e spit haltu ku Dòktor kier a implementá emansipashon. Segun Frater Radulphus: “derechi di voto pa tur hende hòmber mes, Dios sa, kòrda pa hende muhé”. (1) E kiebro ta bira definitivo na 1948 ora Dòktor lanta Nationale Volkspartij. Algun integrante di CRKP a sigi Dòktor i otronan ta funda KVP. Meskos ku CRKP, KVP tabatin bendishon di iglesia.

Despues di elekshon di 1959, KVP a forma Bestuurscollege ku Partido Demokrat (DP). Iglesia ta desaprobá esaki totalmente pasombra DP tabata den su wowo, e enemigu anti-katóliko. Mgr. Holterman ta prohibí KVP sigi usa “katholiek” den su nòmber i despues ku KVP no a kumpli ku su instrukshon, esaki ta bai prensa i deklará ku iglesia no ta sostené KVP mas. Na 1960 KVP ta kambia su nòmber di “Katholieke Volkspartij” pa “Konstructieve Volkspartij” i ta sigi usa e abreviashon “KVP”.

E kambio no a kalma iglesia. E portabos di iglesia, Amigoe di Curaçao, konstantemente tabata tilda KVP di no ta representá katólikonan real pasombra e partido a tribi di bai traha ku DP i forma un “monsterverbond”.  E korant, den un editorial ta pidi pa no vota KVP pasombra esaki “lo ta funesto”. (2)

Na 1962 KVP a bai elekshon di Staten i ta saka 0 asiento. Na 1963, elekshon di Eilandsraad, tambe KVP ta saka 0 asiento i KVP despues ta desaparesé. Diósesis ta logra kaba ku KVP, pero for di 1962 a bira opvio ku e forsa di iglesia pa mete direktamente ku polítika a mengua mientras DP durante di e dékadanan ku a sigi a demostrá su enorme forsa elektoral.

Na 1966 Dòktor ta fayesé i Obispado ta ninga pa dera Dòktor den un santana katóliko ounke ku e tabata katóliko. Iglesia tampoko a pordoná Dòktor di a bandoná CRKP. Riba 26 òktober 2007 Pader Amado Römer den Basílika Santa Ana (foto) ta pidi pordon pa e akto kontra di Dòktor.

Willemstad, Kòrsou

1. H. Pieters Kwiers, Ideal Polítiko di Dòktor, 1991 2. Amigoe di Curaçao, 20 mei 1959