Promé elekshon voto universal ta produsí gobièrnu ku ta kai den 37 dia

Hopi gobièrnu a bai kas promé ku tempu. E rèkort ta kaida despues di 37 dia. Esaki ta riba nòmber di Kolegio da Costa Gomez ku a sinta di 10 mei pa 17 yüni 1949. Ta trata di e gobièrnu ku a forma despues di e elekshon den kua pa promé biaha tur hòmber i muhé por a vota na mart 1949.

Nos demokrasia parlamentario a start na aprel 1938 ku instalashon di 10 Miembro di Parlamento (MdP) pa kua un grupo limitá por a vota. E sobrá 5 MdP a keda nombrá pa Gobernadó. Na 1948 nos ta haña un konstitushon nobo ku ta marka un era nobo. E ta habri kaminda pa un Parlamento skohí di 21 hende, derechi di voto universal, i kreashon di un College van Algemeen Bestuur (CAB) ku tabata preludio pa un Konseho di Minister. Tambe a introdusí e nòmber Antia Hulandes.

Despues ku Partido Nashonal di Pueblo (PNP) a gana elekshon di mart 1949 ku 4 asiento (foto), Moises da Costa Gomez (Dòktor) ta bira formadó. Formashon entre partidonan di Kòrsou a resultá imposibel.  Partido Katóliko di Pueblo (KVP) ku 1 asiento ta yama Dòktor traidor i ta hala atras. Meskos Partido Demokrat (DP) ku 3 asiento. Tòg Dòktor ta logra haña sosten di 5 asiento di AVP di Aruba, 1 di Boneiru i 3 di Isla Riba pa un total di 13. 

Riba 3 di mei 1949 Staten ta reuní pa aprobá Kolegio da Costa Gomez. Emoshonnan ta bai hopi haltu den Staten, prinsipalmente ora MdP “Colá” Debrot di KVP kritiká Dòktor. Kos ta sali for di man i ta pidi kuerpo di paga kandela saka públiko afó. Promé ku votamentu MdP Yrausquin ta bandoná AVP i djòin Union Nacional Arubano (UNA). 12 MdP ta vota pa Kolegio da Costa Gomez. Tres siman despues otro MdP di AVP ta djòin UNA, hasiendo e sosten di Kolegio da Costa Gomez 11.

MdP pa PNP, da Costa Gomez i Plantz, ku a bira  parti di gobièrnu a krea dos vakatura den Staten. Koalishon ku tabatin sosten di solamente 9 MdP tabata bòikotiá tur intento pa reunion públiko. Finalmente oposihon ta forma korem pa reunion. Promé ku por a yena e vakaturanan di PNP oposishon ta aprobá ku 9-6 un moshon di deskonfiansa kontra di Kolegio da Costa Gomez.

E promé gabinete salí for di voto universal ta bai kas despues di 5 siman. Gobernadó ta instruí instalashon di un ‘zaken kabinet’. Si e ta zona konosí, ta pasombra e ta. Promé gabinete di Kòrsou ku a sinta na 2010 a bai kas promé ku dos aña. Igualmente a sigui un ‘zaken kabinet’. 

Willemstad, Kòrsou

Fuente: Archivo Nashonal, Staatkundige Ontwikkeling Nederlandse Antillen, dr. Kasteel; De Tijd, 10/6/49

Advertisement