2 di yüli ta Dia di Bandera. Ménos konosí ta ku riba 2 di yüli pa promé bia Kòrsou a haña gobernashon propio. E no ta bin dilanti sufisiene ya ku (kasi) tur atenshon ta pa nos bandera.
Kòrsou promé bia ta konosé gobernashon propio riba 2 yüli 1951. Pues outonomia no a kuminsá na 1954 ku firmamentu di Statüt, sino ku introdukshon di un konstitushon nobo, yamá Interimregeling, riba 7 febrüari 1951. Basá riba e kambio konstitushonal, nos promé Konseho Insular (KI) a sinta, despues di elekshon di 4 di yüni 1951 pa skohe e representantenan di e órgano nobo. 2 di yüli ta mas ku solamente Dia di Bandera. E ta selebrashon di 68 aña di gobernashon propio.
E promé elekshon pa KI a konosé e siguiente resultado: Partido Nashonal (NVP) ta gana elekshon ku 9 asiento, Partido Demokrat (DP) ta saka 8, Partido Katóliko di Pueblo (KVP) ta saka 3, Partido Independiente di Kòrsou (COP) ta saka 1, i Arbeiderspartij (AP) konosí komo ‘Partido Warawara’, no ta saka asiento.
E promé 21 miembronan di KI tabata: NVP: Sr. Hendrik Pieters Kwiers, Sr. Ernesto Rozendaal, Sra. Angela de Lannoy-Willems, Sr. Benjamin Römer, Sr. Philip Cohen Henriquez, Sr. Edward Broos, Sr. Romano Tschumie, Sr. Heraclio Henriquez i Sr. Charles Voges. DP: Sr. Efraim Jonckheer, Sr. Ciro Kroon, Sr. Ramez (Ronchi) Isa, Sr. Steef v.d. Meer, Sr. Cornelis (Nene) Hueck, Sra. Louisa Van der Linde-Helmijr, Sr. Julio Rosario i Sr. Tjerk Petzoldt. KVP: Sr. David Capriles, Sr. Elias Morkos i Sr. J. ‘Jonchi’ Jonckhout. COP: Sr. Philip Evertsz.
S.E. Gobernador Anton Struycken durante un reunion solèm di KI riba 2 yüli 1951 a bisa: “Een eigen orgaan voor de behartiging van zijn belangen schept voor Curaçao grotere mogelijkheden dan ooit tevoren om de lens scherper in te stellen op de eigen problemen en mogelijkheden”. Sr. Michael Gorsira, e promé Presidente di KI i e promé ku a papia na Papiamentu den KI (wak potrèt ariba di Archivo Nashonal), a konkluí su diskurso ku a start na Hulandes: “Laga nos tur rekordá ku di awor en adelante nos lo haña e gobièrnu ku nos mes trese na poder i ku nos mes lo mester karga tur responsabilidat pa tur e loke e gobièrnu aki hasi. Laga nos demostrá responsabilidat. Esei lo ta e mihó prueba ku nos por duna ku nos meresé e outonomia ku tantu nos a anhelá”.
Willemstad, Kòrsou
Fuente: Archivo Nashonal
Alex David Rosaria Blog 