E dianan aki bo no por bai un kaminda sin tende e disgusto pa ku salarionan astronómiko den instanshanan ligá ku Gobièrnu. Ta parse ku a lubidá ku durante di e periodo 2012-2016 a entregá un konsepto di lei Optimalisatie Overheidsgelieerde Entiteiten ku entre otro ta limitá legalmente e salario di e personal na e instansianan menshoná. Apesar di preshon polítiko i sindikal, e lei a pasa ougùstùs 2016, djis promé ku elekshon. Despues di kasi 3 aña no a publik’é i e no a drenta na vigor.
Hopi di esnan ku awe ta grita kontra di e salarionan haltu, na 2015/2016 a lucha kontra di e lei ku a keda introdusí hustamente pa motibu di prekupashon grandi p’e situashon finansiero di instanshanan ligá ku Gobièrnu i e peso ku e tabata pone riba nos finansa públiko. Su intenshon tabata pa fortifiká nos finansa despues ku a kita e ‘aanwijzing’ ku e Gobièrnu anterior a haña.
E akshonnan di 2012-2016 ku a saka nos pais for di ’aanwijzing’ no mester keda konsiderá komo un remedi di solamente un biaha ku lo keda traha pa semper. Durante 2012-2016 nos krísis tabata un di índole finansiero. E akshonnan tumá tabata pa pone un fundeshi finansiero sólido sin kua, un desaroyo ekonómiko ta imposibel. No ta kuestion ku e ‘pashènt a muri despues di 2016’, pero ku nos a faya di sigui di ta prudente i antisipá riba kambionan mundial ku ta afektá nos situashon.
No por stòp, pero mester sigui ku e inisiativanan Begrotingskamer, Optimalisatie Belastingdienst, OECD Compliance, Centrale Huisvesting i naturalmente Optimalisatie Overheidsgelieerde Entiteiten. Si nos no kontrolá nos finansa, pa semper nos lo keda chambuká ku medidanan finansiero sin por krea e espasio rekerí pa trese e konfiansa ku ta nesesario pa invertí den nos pais.
Willemstad, Kòrsou
Alex David Rosaria Blog 