Outoridatnan di Kòrsou na komienso di siglo pasá tabata man na kabes debí na kantidat grandi di sushedat, djaka i raton den nos suidat kapital. Awe esaki no mester ta un sorpresa. Sorprendente si, ta e medidanan ku gobernantenan a tuma pa remediá e situashon indeseabel i alarmante den Punda, Otrobanda i Pietermaai.
Prokuradó General a publiká na 1908 un anunsio den kua e ta pidi pueblo pasa na Fiskalia ku mas tantu djaka i raton morto posibel. Fiskalia tabata paga un depchi (10 sèn) pa kada djaka morto i 2 sèn pa kada raton morto. Pa nos haña un idea, e tempu ei 4 webu di galiña tabata kosta un depchi.
E kampaña tabata un éksito rotundo i a haña publisidat den hinter Reino. Sifranan ta mustra ku durante di e promé siman a entregá 219 djaka i 944 raton. En total e kampaña aki a kosta 20,000 florin i a produsí algun shen mil djaka i raton. Tambe a eliminá lugánan di benta sushi ilegal den nos suidat kapital. Punda a resultá di ta e parti mas sushi. Finalmente tabata huma sierto barkunan di bela, prinsipalmente esnan ku tabata trafiká pa Venezuela, lokual a mata kantidat grandi di djaka i raton.
Willemstad, Kòrsou
Archivo Nashonal; Curaçao van Kolonie tot Autonomie, Dr. Joh. den Hertog; Suriname, Koloniaal Nieuws- en Advertentieblad, 14.7.1908
Alex David Rosaria Blog 