E Emperador ku tabata biba na Kòrsou den Keizershof

Na skina Hoogstraat i De Rouvilleweg nos ta haña Keizershof, un monumento kombertí ya hopi tempu den un sentro di entretenimentu i mas resien un ‘boutique hotel’. Hopi di nos probablemente no sa ku na e adrès aki, Hoogstraat 11A un emperador (keizer) tabata biba ku su staf i ku e tabata ehersé algun funshon imperial. Di bèrdat.

Na 1844 Repúblika Dominikano (RD) despues di batayá ta haña su independensia di Haiti ku promé tabata okupá hinter e isla Hispañola. Na 1847 Fautine-Élie Soulouque (1782-1867) ta keda apuntá komo presidente di aktual Haiti. Na vários okashon e ta purba rekonkistá RD, pero sin éksito. Na 1849 e ta keda proklamá Emperador Faustin I i tres aña despues e ta keda koroná komo tal. Na 1859 militarnan ta lanta kontra di dje spesialmente despues di algun viktoria sensibel di RD riba Haiti. Emperador Faustin l ta bai den eksilo na Jamaica.

Jamaica na 1865 ta konosé un revolushon sangriente lokual ta fòrsa e emperador kue un barku di Kòrsou yamá Rigolette i ta yega nos isla ku algun siguidó riba 19 desèmber 1865. Aki e ta bai residensiá na Hoogstraat 11A kaminda pa algu mas ku un aña e ta keda ehersiendo algun funshon komo emperador di Haiti. Posiblemente na komienso di 1867 e ta regresá Haiti kaminda poko despues e ta muri. Ningun di e poseshonnan -aparentemente spektakular- di Emperador Faustin l ku a keda despues di a bandoná nos isla, a sobrebibí. Un parti interesante di nos historia a bai pèrdí i awe ta práktikamente deskonosí.

Willemstad, Kòrsou

Advertisement