Presidente di Venezuela, Guzmán Blanco, na 1877 a informá Parlamento di su pais ku su pasenshi a kaba ku Kòrsou i ku no a keda nada otro pa kumpra nos isla. E a bisa di ta dispuesto pa paga “muchu mas plaka ku Kòrsou tabata bal.” No esei so, e kier a hasi Kòrsou kapital di Venezuela i a predisí ku siendo Venezolano, Kòrsou lo bira e suidat di mas grandi, riku i limpi di Karibe.
Blanco tabatin problema ku su enemigunan polítiko tabata haña refugio aki i por a kumpra arma. Loke mas a irit’é ta ku Kòrsou no kier a ekstraditá algun di su oponentenan. Kòrsou a para ariba ku no tabatin prueba si e hendenan aki a hasi algu robes. Mester remarká ku dia Blanco tabata den oposihon i kier a bin na poder, e ora ei si Kòrsou tabata un bon amigu ku tabata bende su hendenan arma i duna nan refugio.
Promé ku Blanco lansa su idea pa kumpra Kòrsou, Venezuela ya a kibra relashonnan diplomátiko ku Hulanda (konsekuentemente nos tambe) i tabata trata na tur manera pa boikotiá Kòrsou ekonómikamente. E kompra di nos isla den wowo di Blanco tabata pa evitá ku kontra-revolushonarionan ta usa Kòrsou pa destabilisá su pais. Na 1877 mes Blanco a keda bahá, i relashonnan a keda reestablesé. Na 1879 Blanco ta bolbe bin na poder i ta keda insistí pa kumpra Kòrsou.
Ni Kòrsou ni Hulanda a tuma Blanco i su plan na serio. E konosido Yu di Tera, Abraham Chumaceiro, tabata un di e pokonan ku a mete i a skibi un dokumento titulá “Is Curaçao te koop?”
Den un entrevista publiká den Amigoe di Curaçao di 4 yüni 1982, Konsul General na Kòrsou, José-Angel Oropeza Ciliberto, a deklará ku nos no mester mira e “oferta” e tempu ei komo un menasa. E a bisa ku tabata mashá normal pa paisnan kolonial kumpra teritorio. Komo ehèmpel e a bisa ku Inglatera a kumpra Trinidad i Tobago, lokual nos sa ku ta un mentira flagrante. E korant briyantemente a titulá e entrevista komo “[El] Hermano bedoelt het weer goed” referiendo na e lema “Somos hermanos” ku te awe sierto hende ta kere siegamente.
Willemstad, Kòrsou
Alex David Rosaria Blog 