Mas o ménos 2 aña promé ku 10-10-10 a disidí ku “mas pronto posibel despues di desmantelashon di Antia Hulandes lo introdusí un moneda nobo pa e union monetario Kòrsou i Sint Maarten”. E moneda a haña nòmber di florin Karibense (Caribbean guilder) i e abreviashon CMG (“C” pa Kòrsou i “M” pa Sint Maarten). Tambe lo a eliminá biyete di 25 pa un biyete di 20. Nuebe aña despues di desmantelashon no tin CMG i ketu bai ta usa moneda di un pais no-eksistente.
Banda di sigui usa moneda di Antia Hulandes, no tin ningun mekanismo pa harmonisá/kordiná sierto maneho makroekonómiko entre Kòrsou i Sint Maarten manera ta e kaso den tur union monetario eksistente na mundu. Ningun di e dos paisnan sa si nan ke keda aden òf ta bula for di e union. Kòrsou i Sint Maarten a bisa na aprel 2014 di lo bai studia si mester keda den e union monetario i/òf mester introdusí US dòlar of euro, pero na yüli 2015, riba mi pregunta, minister di Finansa ta bisa ku “un estudio riba e union monetario no ta un prioridat”. Nos ta den un matrimonio monetario pero kada ken ta kue su propio kaminda. Wak por ehèmpel e “groeistrategie” i bo ta kere sigur ku Kòrsou no ta den un union monetario.
E desishon pa forma un union monetario tabata deskabeyá, sin fundeshi ekonómiko. Mi a remarká esaki for di 2006 siendo e úniko mandatario ku a protestá. E manera ku ta atendé ku e tema kombiná ku tur e dramanan rònt di Banko Sentral no ta traha den nos bentaha komo pais i nos ambishon di ta un sentro finansiero stabil i konfiabel. Nos historia di posponé desishonnan klave a kosta nos karu. Esaki lo no ta un eksepshon.
Willemstad, Kòrsou
Alex David Rosaria Blog 