Yama 10-10-10 “Dia di Outonomia” ta muestra di ignoransia di nos historia emansipatorio. Na 10-10-10 Antia Hulandes a keda desmantelá. Pa yama e fecha aki “Dia di Outonomia” ta hasi manera ta na e momentu ei nos a haña outonomia. No ta bèrdat.
Riba 10-10-10 Kòrsou a bira outónomo den Reino despues ku for di 1951 e tabata outónomo den bachi di Antia Hulandes (AH). Es mas, riba 10-10-10 Kòrsou a bira ménos outónomo ku AH tabata. Loke nos a hasi riba e fecha ei ta sali for di AH. Tabatin sigur tres otro fecha akordá pa Konseho di Minister pa desmantelá, pero ku no a logra. 10-10-10 a subi mesa na momentu ku un konsehero a kombensé algun minister ku e fecha ta “zona bon”. Mi tabata den e reunion en kuestion.
E proklamashon deskabeyá aki ta ignorá e kuantioso akshonnan di nos antepasadonan den e lucha pa outonomia. Outonomia no tabata un pakete ku a surgi riba un dia i sigur no riba 10-10-10. Bo tin e promé Parlamento ku a keda instalá na aprel 1938. Interim Regeling ku a sòru pa outonomia interno na febrüari 1951 i despues, Statüt na desèmber 1954. Na 1948 un lei nobo a proklamá ku tur hòmber i muhé por a vota. I asina tin hopi mas momentu den nos historia ku a kontribuí na outonomia inkluso loke Staten na 1946 a yama “e promé paso pa gobernashon propio”, esta nombramentu di un representante di nos pais na Hulanda. Esnan grandi den nos lucha pa outonomia e.o. a keda rekonosé pa Staten na 2013 (Moises da Costa Gomez, Abraham Chumaceiro, Généreux de Lima) i otronan no-rekonosé ainda, Charles de la Try Ellis i Damanan di Djarason.
Yama 10-10 “Dia di Outonomia” ta un falsifikashon di historia i un sla den kara di esnan ku a lucha pa mas ku 150 aña pa loke nos tin awe. E ta un intento pa adorashon propio. Bo ke selebrá 10-10 na 2019? Yamé Dia di Desmantelashon di Antia Ulandes. Yamé Dia di Kòrsou Outónomo den Reino. E no ta “Dia di Outonomia”.
Seoul, Repúblika di Korea
Alex David Rosaria Blog 