Tur aña tin 16 mión intento di suisidio rònt mundu. Di nan, 800,000 ta resultá den suisidio. Pues kada 40 sekònde un hende ta mata su kurpa. Riba 10 di òktober Nashonnan Uní (UN) a deklará Dia Internashonal pa Prevenshon di Suisidio ku meta pa konsientisá i prevení.
Sigun datonan di UN, Kòrsou pa kada 100,000 suidadano ta registrá 4.6 suisidio na aña 2010. Ounke ku esaki ta hopi mas abou ku sifranan di 2016 di Sürnam (23.2) i Hulanda (9.6) e ta mas haltu ku nos rumannan Karibense: Barbados (0.4), Antigua & Barbuda (0.5), Bahamas (1,6) Grenada (1.7) Jamaica (2.0) i St Vincent (2.4).
Lo ta bon pa ekspertonan na un manera habrí papia i konsientisá nos poblashon tokante e tema aki. Nos ainda tin e tradishon di stigmatizá, kondená i asta yama esnan ku a kometé (òf hasi intento di) suisidio, loko. E ta relatá na e tradishon di Iglesia Katóliko di hopi siglo di p.e. ninga un entiero Katóliko na un persona Katóliko ku a mata su kurpa i bai asina leu di bisa ku e “lo no por “drenta shelu”.
Stigmatisashon i dramatisashon segun ekspertonan no ta yuda e kousa. Silensio tampoko. Mester trata suisidio komo un aspekto di salú públiko. Suisidio mester keda rekonosé komo un intento (desesperá) pa skapa di un sufrimentu ku a bira asina grandi ku e persona no ta mira otro manera pa haña alivio ku no ta morto. Loke tambe nos mester realisá ta ku e persona ei lo a preferá un otro alternativa. Nos no mester kondená e persona ku ta konsiderá suisidio, pero yud’é haña un alternativa.
Seoul, Repúblika di Korea
Alex David Rosaria Blog 
Komo edukador mi ta hopi konsiente ku nos hobennan mester di e informashon aki. Komo aporte na e reto pa konsientisa nos hendenan i espesial hobennan di kiko ta suisidio mi kier a entrega un foyeto ku mi a traha na 2007 tokante di suisidio. Esaki durante di mi estudio pa diploma didáktiko i pedagógiko. E foyeto a keda parti na skol avansa i na diferente sitio na Boneiru. Mi ta dispuesto pa entregé na un instansia òf Gobiernu di Kòrsou pa laga drùk’é i reparti pa skolnn avansa i otro sitionn ku tur suidadano por disponé di dje.
LikeLike
Bon inisiativa. Mi ta rekomendá tuma kontakto ku Ministerio di E señansa i esun di Desaroyo Sosial.
LikeLike
Korektamente, esaki den un totalidad di aserkamentu di tendensia of fenomeno den sosiedad. Dos aña pasa Nashonnan Uni a dedika e aña pa atenshon na malesa i kwido di salud mental. E eskoho aki entre otro base di sifranan similar. Sosiedad tin e nesesidad di libra su mes di taboo i limitashonnan impone pa kultura, tradishon, religion i politika ku ta influensha hustamente un aktitud i aserkamentu no siviliza. Bon punto!
LikeLike
Danki pa bo komentario. Bo frase “Sosiedad (sic) tin e …..” ta un bèrdat ku ta stroba progreso, no aki so, pero mundu kompleto.
LikeLike