Kontá ku nos outonomia?

27 òktober 2019 ta 112 aña ku Moises Bikker (e fam da Costa Gomez a bin despues) a nase den Otrobanda. Moises da Costa Gomez, Dòktor, ta sinónimo ku nos outonomia. Mi ke tira un bista riba kalidat di nos outonomia.

Segun Dòktor outonomia polítiko su meta kontinuo mester ta: hisa kalidat di bida di hende. E a konkluí korektamente na 1935 ku un maneho kolonial tei pa satisfasé interesnan di e kolonisadó i no di e kolonia. Promé ku firma Statüt Dòktor a atvertí ku e proseso di outonomia ta inkompleto. For di 1946 e a presentá  ideanan pa mas demokrasia manera un Korte Konstitushonal ku no a keda inkluí den Statüt. Aparentemente Dòktor tabata traha un revishon di konstitushonal  ora morto a sorprend’é na 1966. Nunka a haña e tekstonan. 

Literatura di i tokante Dòktor ta mustra ku p’e outonomia ta karga responsabilidat, un bon relashon den Reino i ku mundu, tambe bon gobernashon pa garantisá adelanto di kada suidadano.

Awe mi ta konstatá ku nos outonomia a keda redusí na meramente un struktura ku algun ta kere ta konstantemente bou di atake di Hulanda, Illuminati i un grupo internashonal di mitar hende mitar rèptil. Realidat ta sinembargo ku nos no a traha riba e aspekto esensial di outonomia: kalidat di e hendenan ku mester manehá nos struktura outónomo. Ta parse ku mas kriminal bo ta, mas populista bo ta, mas bo lastra hende i ménos kapas bo ta pa komprondé i analisá e entorno kompleho ku nos ta biba aden, mas voto bo ta haña. E kalidat di e hende ku ta manehá nos outonomia ta deplorabel i ku esei, nos outonomia tambe.

Awe e menasa pa nos outonomia no ta Den Haag ni Illuminati sino nos mes hendenan sin kapasidat ni integridat ku ta manehá nos asuntunan públiko. I tambe, nos pueblo ku ta vota pa nan. Un bon paso pues ta stòp di sostené hendenan ku ta preferá laga otro bin djafó i hasi lokual nos sa bon bon ku nos mes mester a hasi, pero no tin e kurashi pa hasi. Outonomia ta madures pa karga responsabilidat ounke ku e por ta amargo. E no ta un promesa bashí ku nos ta usa pa dal man riba pechu kulpa tur otro hende -ménos nos mes- pa nos problemanan.

Koror, Repúbilka di Palau