E artíkulo mas lesá na 2019: Iglesianan a Uni pa antagonisá i sembra odio

Mi ta yama danki na e miles di hendenan di un total di 151 pais ku a tuma tempu pa lesa mi artíkulonan riba mi blog i publikashon an lokal i internashonal ku a referí na algun di mi artíkulonan. E intenshon ta pa mi keda skibi na un manera independiente riba diferente tema internashonal i lokal. Un dushi temporada di fiesta pa tur hende. Felis aña nobo.

Sin duda e artíkulo ku durante 2019 a keda mas lesá ku tur otro ta: “Iglesianan a Uni pa antagonisá i sembra odio”

                                                            ***/***

IGLESIANAN A UNI PA ANTAGONISÁ I SEMBRA ODIO 

Na lugá di pasifiká boso a skupi odio. Na lugá di prediká kompashon boso a skohe pa demonisá e grupo LGBTQ ku ta lucha pa trato igual komo hende. Esaki ta e mesun lucha ku e katibu a hiba, mesun lucha ku hende di koló (t)a hiba i e mesun lucha ku hende muhé (t)a hiba. No tin diferensia.

Boso ta na altura kuantu di boso sirbidónan ta LGBTQ? Boso ta na altura kuantu di boso sirbidónan tur dia di nobo ta metí den abuzu seksual di mucha bou di edat? Klaro ku boso sa pasombra boso ta dominá e arte di bira kara, bari e problema bou di tapeit òf pòst’e pa otro parokia. Ta p’esei boso no a papia ora un pastor lokal a bai prizòn pa abuzu seksual. Mesun silensio ora e postema di abuzu a baster na Chile, Merka, Costa Rica i Vatikano. Pero boso ta kla pa subi tarima den Punda i husga otro sin wak den spil promé.

Bèrdat ta pará den e buki religioso Kristian, Beibel, ku homoseksualidat ta un piká i ku esaki mester keda prohibí (Leviticus 18:22). Pero riba e mesun blachi di e Beibel tin mas prohibishon i piká severo e.o.: tatuahe na kurpa (Leviticus 19:28), bisti paña ku ta trahá di dos òf mas material (Leviticus 19:19) i kòrta bo kabei i/òf barba den un forma rondó (Leviticus 19:27). Mi punto ta ku ta masha fásil pa bo ‘cherry pick’ net e puntonan ku ta sostené bo pensamentu ku abo tin mas derechi ku otro i bisa:  “Beibel ta  bisa ku…”. Pero ta ken a dunabo e poder pa usa bo interpretashon religioso selektivo i kumbiniente pa papia na mi nòmber? 

E spektákulo ayera no ta un sorpresa. Mi no a fèrwagt otro di un grupo ku ta moralmente bankarota.

Finalmente, bo no mester ta un hende muhé pa sostené trato igual pa muhé. Bo no mester ta Hudiu pa kondená Holokosto, bo no mester ta un LGBTQ pa sostené trato igual pa hendenan ku un preferensia seksual ku nan a nase ku n’e pero ku no ta meskos ku esun di bo. Loke nos komunidat mester ta mas hende ku ta drei wak nan bisiña i bisa nan:”ken ami ta pa diskriminá bo i kita bo derechi riba igualdat a base di bo koló, sekso, orígen, religion, kredu, status ekonómiko i preferensia seksual”.

Loke e iglesianan a hasi ayera na Alameda ta tipifiká lokal ta putrí den nos komunidat: alimentá intoleransia, diskurso di odio i mentalidat di “nan kontra nos”. Ta opvio ku bo no por unifiká na mes momento ku bo ta dividí. Bo no por evangilisá na mes momentu ku bo ta antagonisá.

Willemstad, Curaçao