Un sektor grandi di nos komunidat tabata eufóriko ora e lei di screening (ofisialmente: Landsverordening integriteit (kandidaat-) ministers) a keda publiká na oktober 2012. Por a skucha un suspiro kolektivo di alivio pasombra nunka mas lo pasa e bergüensa na 2010 ora un sèt di minister sin eskrúpulo a burla di e proseso di screening anterior.
Pero esei tabata 2012. Awe algun di e mesun aktornan ku a aploudí e lei di screening na 2012, ta deklará ku e lei, derepente, no ta hustu mas. Diferensia entre 2012 i 2019/20 ta: e lei ku tabata bon pa esnan sin étika e tempu aya, a obligá dos minister di e koalishon aktual tuma retiro (di kua unu a rekonosé su akto kastigabel den un “deal” ku Ministerio Públiko i a haña un “proeftijd”).
Awe ta papia ku e lei no ta hustu i no ta kumpli ku su ”berdadero” intenshon. Tambe, ta bisa ku Hulanda no tin lei di screening manera nos. E delaster ta bèrdat. I tin mas lei i tratado ku nos tin pero ku Hulanda no tin. Tambe vise versa Hulanda tin un kantidat di lei manera lei di eutanasia, belasting riba kachó di kas i tambe reglanan stringente pa protehá medio ambiente ku nos no tin. Si nos ke tur lei Hulandes ta mihó skràp outonomia i bira provinsia.
Nos mundu tin hopi ehèmpel di hipokresia i set pa poder ku (t)a pone polítikonan kita, kambia lei i reglanan ku tabata perfekto pa oponentenan polítiko pero no pa nan. Ehèmpel ta Daniel Ortega di Nicaragua ku a lucha pa kaba ku poder di famia Somoza di 45 aña dor di revolushon i kambio di konstitushon. Awe Ortega a kita, pone lei, kambia konstitushon pa pèrmití ku e por keda na mando pa bida largu akompañá pa su vise-presidente ku ta su kasá!
Na 2014 (Paisahe, Nr. 5, mart 2014) mi a boga pa no kita lei di screening manera e aktornan ku a bin na mando na 2010 (i ku entre 2012-2016 tabata den oposishon) tabata deseá. Mi a sugerí pa amplia e lei i pone mas regla, spesialmente ora un minister baha.
Awor, semper por i ta asta nesesario pa kambia lei debí ku sirkunstansianan a kambia. Pero pa trese kambio i swak e lei di screening pasombra e lei a obligá 2 minister di koalishon tuma retiro, no ta un rason bálido. Esei ta hiprokresia i kontra di nos (sentido di) estado di derechi. E ta hasi esnan ku awe ta boga pa kambia lei mesun sin eskrúpulo ku esnan di 2010. No tin diferensia.
Willemstad, Curaçao
Alex David Rosaria Blog 