“Slapend rijk”: Kon Amstel a kòrta suèldo mínimo

Kasi 15 aña pasá Heineken a sera Amstel na Kòrsou. Amstel semper a gosa di protekshon, pero bo tabata sa ku Amstel durante un periodo a paga su trahadónan solamente 2/3 parti di suèldu mínimo fihá pa lei pa asina maksimalisá su ganashi komo monopolio? 

E kompania Hulandes Amstel Brouwerij na 1958 ta lanta Antilliaanse Brouwerij (“Amstel”) na Kòrsou eksihiendo protekshon i tax holiday promé e kuminsá operashon. Amstel, aparentemente no kontentu ku su ganashinan i dividènd anual di 10, 15  i 18%, riba 3 febrüari 1972 ta aserká Gobièrnu pa -banda di tur protekshon i monopolio ku ya e tabatin- un protekshon adishonal: pèrmit p’e paga su trahadónan 2/3 parti solamente di salario mínimo vigente pa luna (Naf 259.80 enbes di Naf 346.40). Ku sosten sindikal e petishon ta keda onrá i ankrá den lei (P.B. 1972 No. 196). Kurioso ta ku ta sektor privá (Mensing Trading & Co.) so ta protestá.

Hustifikashon di e lei tabata: “garantisá eksistensia di Amstel”. Lo bo pensa ku e monopolista di serbes tabata den problema rònt di aña 1972. Pero, apenas 9 dia promé ku Amstel pidi redukshon di sueldo mínimo, e ta anunsiá un ganashi di Naf 179,000 pa 1971*. Na 1969 e tabata Naf 202,452 i na 1970, Naf 203,478.

Amstel i mayoria di industrianan lokal protehá semper a bati na porta i haña oido di Gobièrnu pa protekshon èkstra ora tabatin (menasa di) kompetensia. Kada florin di protekshon sinembargo tabata sali foi saku di e konsumidó.

Na 2005, Amstel (entretantu pa mas ku 50% den man di e gigante Heineken) a pidimi komo minister di Ekonomia un areglo pa tur aña no paga Naf 5 mion na akseins. Pues un supsidio pa Heineken i un défisit presupuestario anual di Naf 5 mion. Mi a rechasá e petishon i Heineken a sera Amstel. Oponentenan (t)a deklará ku ta ami i no e doño poderoso Heineken a sera Amstel pa krea rabia i kòrtina di huma. Ora e stòf a baha tur hende a realisá ku esaki tabata e último rosea di protekshon di merkado ku kuriosamente a start (1958) i tèrmina (2015) ku Amstel. E deseo di Amstel tabata pa kontinuá ku su estilo di maneho “slapend rijk worden” ku pa kasi 50 aña a keda akseptá den Fòrti i defendé pa un grupo sindikal.

Willemstad, Kòrsou

Fuente: wjz.gobiernu.cw, Archivo Nashonal, https://alexdavidrosaria.blog/2018/03/28/pakiko-heineken-a-sera-amstel-un-analisis/

* Midí na forsa di kompra di awe esaki ta algu mas di Naf 1 mion