E daño ku a keda hasí na brùg Juliana awe mainta a kousa bastante konsternashon. Sinembargo esaki no ta promé biaha ku nos brùg nobo a keda alkansá pa un barku.
Riba djamars 8 di ougùstùs 1978, e “boortoren” yamá Western Offshore VI a dal brùg Juliana na momento ku esaki tabata drenta haf. E daño kousá a keda kalkulá na Naf 110,000 (awe: Naf 450,000). E ”boortoren” tabata propiedat di un kompania prestigioso di Texas den negoshi di petroli i gas.
Despues di un investigashon a resultá ku falta di e aksidente tabata serka kapitan di e barku Merikano. A sali na kla ku e kapitan a informá outoridatnan di nos haf ku e ta kalkulá haltura di e “boortoren“ na 173 pia. Dor ku brùg Juliana ta 185 pia haltu, e barku a haña pèrmit pa drenta haf. A resultá sinembargo ku haltura di e “boortoren“ a surpasá 185 pia. E kapitan a duna informashon robes na nos inspektor di haf lokual a kousa e aksidente.
Outomobilistanan ku na e momentu di e aksidente tabata trafiká riba brùg a bisa di a tende un zonido espantoso i a eksperiensiá un “sakudimentu” bastante violento.
Poko despues di e insidente, e kompania doño di Western Offshore VI ta entregá un garantia di banko na Teritorio Insular di Kòrsou i ta bandoná nos isla.
Willemstad, Kòrsou
Fuente: Archivo Nashonal
Alex David Rosaria Blog 