Mi no ta gusta daña fiesta, pero un dia despues di Dia Internashonal di Hende Muhé, mester di reflekshon. Un bista riba vários ekspreshon hasí na Kòrsou ta bisto ku e movementu di feminismo te ainda ta definí komo un lucha di hende muhé kontra hende hòmber.
Hende muhé ta gana ménos ku hende hòmber. Bèrdat. Hende muhé ántes no por a sigi traha ora e kasa mientras e hende hòmber kasá si tabata por. Meskos ta konta pa votamentu, sierto profeshon, aktividat religioso i di Iglesia. Hende muhé ta e género ku mas ta sufri di pobresa i abuzo fisiko. Ami pues ta e último pa ninga ku hende muhé tabata i ainda ta viktima di inhustisia i dikriminashon institushonalisá.
Lokual mi ta puntra sinembargo ta na unda e hende muhé ku ta lucha pa derechi igual entre hòmber i muhé ta pará pa loke ta trata derechi di e muhé lesbiana, transseksual, e muhé ku ke disidí riba abòrtus, e muhé ku ke ta liber pa duna propio kontenido na su género. E muhé ku tin miedu di ta asertivo pa no keda yamá un kachó femenino. E muhé ku ke sali òf biaha su so sin keda keda denominá ku ta hòmber e ta buska òf ku e ta bruwá. E muhé ku ta sinti ku otro muhé ta huzg’e pa su peso, kabei i otro aspektonan nan físiko.
Segun Psychology Today di Aprel 2019 awe e muhé ta mas prekupá pa keda husgá i diskriminá pa un otro muhé.
Muchu largu e movementu di hende muhé a konsentrá riba viktimisashon di e muhé dor di e hòmber. Pa hasi manera no tin diskriminashon kontra hende muhé dor di hende muhé mes, no ta yuda e kousa. Òf a kaso ora un muhé diskriminá un otro muhé esei no ta inhustisia manera si ta e kaso si e keda diskriminá pa e ser maskulino?
Sundance, Wyoming (Merka)
Alex David Rosaria Blog 