Ta opvio ku kos a bai robes ku e pakete di reskate ekonómiko. Tin asta un kaso den Korte den preparashon. Ta di lamentá ku a yega asina leu, pero no ta lat pa drecha e fayonan.
Dos siman pasá mi a bisa (https://alexdavidrosaria.blog/2020/04/09/curacao-needs-to-cushion-covid-19-pain-but-without-real-changes-well-be-back-to-square-one/) ku nos ekonomia ku ta den koma pa motibu di e pandemia covid 19, mester di sosten pa keda na bida. Hende sin entrada no por sobrebibí i negoshi (chikí) mester di kèsh pa mantené trahadónan, paga kuentanan i no bai fayit. Tambe mester invertí den salubridat públiko, sigur salú mental den e tempu aki di trouma.
Mi a atvertí sinembargo ku tur proyekto, ounke kon bon intenshoná, ta faya si no definí koutelosamente esnan ku tin mas nesesidat pa haña sosten (“targetting”). Esaki ta klaramente e kaso serka nos. Falta di dato i kòntròl ta pone ku hopi empresa ta inskribí den un sektor, mientras e ta hasi negoshi den un otro sektor. Tampoko tin kriterio definí ken ta bin na remarke pa sosten. Sierto negoshi a tende ku ounke nan no ta riba e lista nan por apliká tòg i “argumentá” pa asistensia kreando “willekeur”, “vriendjespolitiek” i kaos. Echo ta, sin “targetting” skèrpi, fondonan lo keda mal-aloká i lo no yega esnan mas vulnerabel.
Mi di dos punto tabata e aspekto di ehekushon. E proseso pa apliká pa sosten no ta kana bon. No solamente pasombra tin hopi aplikashon (ku por a spera), pero pa motibu ku Fòrti ta insistí pa laga un aparato ku tin hopi tempu kaba ta chambuká, ehekutá e proyekto aki sin sufisiente ekspertisio i “benchmarks”.
No a yuda ku Hulanda su asistensia tabata ménos ku lokual Fòrti a spera. Tampoko ta yuda ku di e asistensia total di Naf 177, solamente Naf 42 mion ta pa sektor privá i Naf f 135 mion pa sektor públiko. I, te ainda no a determiná kon ta kòrta den e aparato i empresanan ligá ku e sektor públiko.
E proyekto di reskate por resultá un pesadia pasombra su formulashon i ehekushon ta laga di deseá. Sinembargo no por “afford” pa lag’e frakasá. E preis ta muchu haltu. Nos por remediá kosnan ku a bai robes dor di reformulá algun aspekto (ehekushon pober, falta di kritero, “benchmarks” i “targetting”) inkluí representantenan di sektor privá den e komishon.
Willemstad, Curaçao
Alex David Rosaria Blog 