Baha salarionan astronómiko; e lei a pasa na 2016

Hopi hende ta gosa ku Aruba a kòrta gastu den e ámbito públiko i ta lamentá ku aki nos no a hasié. Ta lamentabel, sigur si nos realisá ku tin un lei kla pa atendé ku empreasan ligá ku e sektor públiko. For di 2016 e ta kla, pero no a publik’é. E lei no a drenta na vigor.

Ta trata di e lei Optimalisatie Overheidsgelieerde Entiteiten ku entre otro ta baha e salario di e personal na e instansianan menshoná. Apesar di preshon polítiko i wèlga general, e lei a pasa Staten na ougùstùs 2016, djis promé ku elekshon.

E lei a keda introdusí pa motibu di prekupashon grandi pa e peso riba nos finansa públiko. Su metanan ta drecha kalidat di servisio, baha salario i e kostonan haltu di operashon i minimalisá e riesgo pa finansa públiko: 

✔️Algemene regels bij het plaatsen van opdrachten waarbij marktwerking en transparantie worden bevorderd;

✔️normen voor specifieke kostenposten (uit efficiëntie en om misbruik te verkomen);

✔️richtlijnen voor de personeelskosten (formatierapporten en variant Balkenendenorm);

✔️rendementseisen en dividendbeleid;

✔️handhavend toezicht vanuit de overheid.

Despues di 3 aña e lei ta ketu bai den lachi. Fòrti a laga sa -apesar di (menasa di) “aanwijzing”- ku mester ahustá algun punto. Te leu ku mi sa, no a bisa kua ta e ahustenan nesesario i dikon nan ta asina grave pa laga un lei drumi 3 aña largu.

Fòrti mester bai Staten awor i disidí ku ta ehekutá  e puntonan ku no tin nesesidat pa keda adaptá den e lei ya menshoná. Antó e puntonan ku mester di ahuste, ta warda te ora bin un teksto nobo. Mester buska un manera rápido pa por lo ménos atendé ku e salarionan astronómiko den empresanan ligá ku e sektor públiko. Kisas tin un otro kaminda pa kana, pero nos mester aktua rápido i asumí nos responsabilidat komo pais outónomo.

Covid 19 diariamente ta pone un spil nos dilanti i ta demostrá ku ketu bai nos ke sigui biba riba nos forsa, stèns riba Hulanda pa plaka i no tuma e medidanan ku nos sa ku ta nesesario.

Willemstad, Kòrsou

Advertisement