Insidente Kòrsou i barku Ruso den nos awanan: 1982

Na momentu ku un barku di peska Ruso mester a bandoná nos haf na komienso di desèmber 1982, ningun hende a premirá un insidente internashonal.

Barkunan di peska Ruso ku ta piska den awanan internashonal pafó di Sur Amérika, tin kustumber di bin Kòrsou pa bùnker. Esaki tabata e kaso e biaha ei tambe. Na momentu ku e barku ku tabata mará na waf di KNSM kier a bandoná nos haf, a manda lots de J. pa gui’é. Poko despues ku de J. a subi e barku sinembargo, e a mèldu kantor ku e no ta hasi e trabou ya ku “hinter e tripulashon ta pata pata”.

Outoridatnan portuario a disidí di manda un otro lots (M.) kende tampoko a haña responsabel pa saka e barku. E kapitan Ruso i outoridatnan lokal a kuminsá pèrdè pasenshi. A disidí pa manda lots K.S., un di e mihónan ku Kòrsou a konosé, ku ta logra saka e barku sin insidente. 

Problema ta surgi sinembargo ora K.S. no tin fin di bandoná e barku Ruso i baha den e boto di lots ku tabata ward’é pa regresá Punda. E barku Ruso ku destinashon Panamá a keda nabegá i e kapitan di e boto di lots ta bai tera i bati alarma ku e Rusonan lo a sekuestrá K.S.. Mientras tantu Kantor di Haf ta informá Gezaghebber Cassares kende na su turno ta papia ku outoridatnan di Gobièrnu Sentral i ta manda tres boto kargá ku polis armá ku karabina pa buska e lots. Kòrda, na 1982 mundu tabata tenso debí na guera friu.

Ora  polis a yega e barku ku ya tabata basta leu for di haf, a nota K.S. totalmente bou di su awa riba e barku. Aparentemente e a disidí di djòin e tripulashon den dalmentu di vodka i a lubidá di desembarká. Ademas, e no tabata kapas pa baha e trapi di kabuya. E úniko solushon tabata pa mara K.S. na un kabuya i ‘fir’é’ den un di e botonan kaminda polis a fang’é.

Gezaghebber despues di a papia ku esnan envolví ta primintí un investigashon ’profundo’. Haf sinembargo no a konsiderá e kaso un ‘big deal’ bisando: “No ta nada straño, ku un loods ta dal bitter, ora e guia un barcu. Bo mester corda ku e hendenan aki ta guynan di laman. E olanan ta pone cu nan ta haña gana di dal un drinks “ (Nobo, 4 desèmber 1982). 

Willemstad, Kòrsou

Advertisement