E wega di kompra i benta di voto: historia di volmacht

“Volmacht” ta un konsepto ku nos a kopia di Hulanda. E ta hasi posibel pa un hende ku derechi di voto ku no por ta presente pa vota riba dia di elekshon, pidi un otro persona ku tambe tin derechi di voto, vota p’e. Tur dos mester firma e dokumento, volmacht. E volmacht ta un solushon pa e persona ku ta den eksterior òf inkapasitá dia di elekshon.

Volmacht a keda usá promé biaha den elekshon di Staten di 17 novèmber 1941. Pa haña un volmacht bo mester por a proba ku ora di elekshon bo no ta riba bo isla kaminda bo ta vota i ku bo ta ousente pa no mas ku 6 dia. Den e promé añanan e kondishonnan pa un volmacht tabata transparente i stràk, ademas kada petishon pa un volmacht tabata keda investigá profundamente pa Registro Sivíl.

Gradualmente partidonan a trese kambionan ku a hasi hinter e sistema di volmacht un gol hanchu habrí pa tur tipo di kos robes. Por a pidi pa un volmacht pa motibu di malesa ku mester a keda firmá un luna promé ku elekshon. Segun sifranan di Kranshi, 6 mil hende na Kòrsou (10% di elektorado) tabata “sa” di antemano ku nan lo ta malu riba fecha di elekshon (19 mei 1967) i a pidi un volmacht. Boneiru a konosé un elekshon kaminda e kantidat di volmacht tabata 15% di e elektorado! E korant Algemeen Handelsblad di 19 yanüari 1967 a raportá ku na Aruba tabatin algun shen deklarashon di malesa ku tabata firmá pa e mesun médiko. Asta yunan di tera bibá na Hulanda pa hopi aña tabata risibí volmacht pa nan vota (mientras nan no ta parti di elektorado) segun Kontakto Antiyano, un plataforma pa yunan di tera na Hulanda.

Partidonan na mando semper a probechá mas di volmacht ya ku tabatin mas kos di parti (onderstànt, kas i trabou den aparato públiko) pues mas posibilidat pa kumpra voto. Na komienso di e sistema di volmacht, normalmente ta e kasá òf famia serkano di esun ousente na momentu di elekshon tabata keda apoderá. Na dado momento no tabatin ni mester di un deklarashon di un médiko mas den kaso di malesa. Aktivistanan di partido a probechá i tabata kumpra volmacht pa bai dilanti. Na 1967 tabatin 6031 volmacht di kua 3788 di aktivistanan di DP i 2074 di esnan di NVP. Pues solamente 169 di volmacht no tabata pertenesé na un partido. Korant Amigoe di 14 aprel 1971 ta raportá benta di volmacht na marinirnan Hulandes pa “Naf 5,- i un kaha di chukulati”.

E dos partidonan tradishonal semper a akusá e otro di ta mas korupto, pero tur dos a probechá ku eksepshon di Union Reformista Antiyano (URA), un grupo idealista i korekto ku poko despues a desaparesé. E preshon tòg na un momento dado a bira di tal forma ku Konseho Insular (KI) den un reunion tumultoso den febrüari 1967 a eliminá volmacht. Miembronan ku a vota pa kita volmacht mester a tende un la di zundrá serka nan hefe i spònsernan. Na mart 1967 e mesun KI ta reestablesé volmacht.

E fiesta di volmacht a sigi te na 1977 na momentu ku Staten ta kita e posibilidat di volmacht pero ta laga na keda teritorio pa kit’é òf no. A dura te 1982 pa nos isla eliminá volmacht definitivamente. Ku esaki benta i kompra di voto den su bachi bieu a pasa pa olvido i a kontinuá den otro forma modèrnu.

Willemstad, Kòrsou

Advertisement