Denter di algun dia un minister ku konforme lei a keda fòrsá pa tuma retiro ta programá pa bolbe komo minister den e mesun gabinete. Kontrali na lokual algun hende a skibi, e no ta e promé minister den nos pais pa hasi esaki. E promé tabata minister Jan Pauw, den representashon di Aruba den e promé gabinete di Antia Hulandes. Su motivashon pa hala atras tabata diferente ku e kaso aktual.
Riba 18 april 1951 e promé kabinete ku outoridat ministerial a keda huramentá ku mr. dr. Moises Frumensio da Costa Gomez (Dòktor) na kabes. E repartishon di Kabinete da Costa Gomez (e tempu ei konosí ku Regeringsraad) tabata lo siguiente: da Costa Gomez (NVP), Presidente di Regeringsraad i minister di Asuntunan General, Agrikultura Krio di Bestia, Peska i tambe Suministro di Awa; William Plantz (NVP) Finansa; Jan Pauw (AVP) Obranan Públiko, Willem Lampe (AVP) Hustisia; John Sprockel (KVP) Enseñansa i Desaroyo di Pueblo; Cecil Delvalle (sin partido) Ekonomia i Transporte; E. van Romondt (COP) Salubridat Públiko.
E dos tareanan di prioridat pa e gabinete tabata pa formalisá e struktura definitivo di Reino Hulandes i introdukshon di outonomia pa e teritorionan insular.
Pa medio sèptèmber minister Pauw a anunsiá su retiro ku lo a drenta na vigor riba 1 òktober 1951, apenas despues di 5 luna di a keda huramentá. Jan Pauw su motivashon tabata ku kreashon di Eilandsraad i Bestuurscollege lo a trese ku mayoria tarea di obranan públiko lo a keda desentralisá i saká for di man di Fòrti. Jan Pauw no a haña polítikamente étiko pa keda ku un kartera bashí. Ora Pauw a baha, minister John Sprockel a keda komo interino di Obranan Públiko.
Jan Pauw ta keda reinstalá komo minister den Gabinete da Costa Gomez riba 12 di yüni 1953. E no a bin bèk komo mandatario di Obranan Públiko (ku pa e tempu ei a desaparesé) sino komo minister di Tráfiko i Transporte. Ta bon pa remarká ku Gabinete da Costa Gomez tabata esun ku mas kambio di integrante den hinter historia polítiko di Antia Hulandes. Di e 7 ministernan original, solamente da Costa Gomez i Plantz a sinta hinter e durashon di 4 aña.
Willemstad, Kòrsou
Fuente: Nationaal Archief
Alex David Rosaria Blog 