E gritu di sektor turístiko pa habri nos fronteranan pa kaba manera kos ku nos a gana e bataya kontra di covid 19, ta riesgoso. Tur hende ke pa bida normalisá i ekonomia drei atrobe. Di otro banda ta un hecho ku covid 19 no a desaparesé i ainda no tin kura p’e. Kualkier deskuido relatá na un re-apertura muchu tempran por kousa un brote aki ku konsekuensia fatal pa salú di hende i asta morto. Esaki kier men tambe ku tur e logronan ku nos tabatin te ainda pa evitá ku e virus ta plama riba nos isla, ta bai pèrdí i ku mester kuminsá di nobo, posiblemente na un kosto mas haltu pa salú di hende.
Paradoksalmente e mesun re-apertura ku nos ke pa krea aktividat ekonómiko, por pone nos kai atras ainda mas tantu riba e kaminda pa rekuperashon, si nos no atendé ku e aspekto di salú na un manera sensato. Un brote por nifiká bolbe sera frontera pa di dos biaha, hasiendo e kaminda pa rekuperashon inesesariamente mas largu i kostoso.
Nos no mester lubidá ku nos poblashon su predisposishon pa keda seriamente afektá pa covid 19 ta haltu. Un kantidat grandi di nos hendenan ta sufri di kondishonnan di salú (malesa vaskular, obesidat) ku ta hasi nos èkstra vulnerabel pa e virus. Esaki den kombinashon ku e edat promedio haltu di nos poblashon.
Laga nos analisá e asuntu di re-apertura di nos pais ku koutela. Laga nos no laga agèndanan elektoral, pero siensia guia nos pa prepará un apertura kouteloso, planeá i poulatino. Na final di dia nos mester puntra: kuantu un bida humano ta bal?
Willemstad, Kòrsou
Alex David Rosaria Blog 