31 di mei ta Dia Internashonal Anti Tabako. Tabako ta mata 8 mion hende tur aña, inkluso 1,2 mion humadó pasivo, esta un no-humadó ku ta inhalá huma i nikotina di otro hende. Segun Nashonnan Uní un humadó òf un humadó pasivo ku covid 19 tin mas chèns pa daño na su salú kompará ku un no-humadó. Tras di e sifranan aki tin hopi sufrimentu i gastunan haltu di kuido médiko.
Mi ta kontentu ku algun aña pasá mi a introdusí un lei kontra humamentu den lugánan será ku e meta pa protehá e no-humadó. Ounke ku e lei a aliviá hopi hende, mester konstatá ku ketu bai tin sierto kamindá ku tin humamentu paden. Ta nesesario pa outoridatnan tuma akshon.
Riba Dia Internashonal Anti Tabako ta urgente pone atenshon na produktonan nobo ku ta introdusí nikotina den kurpa humano. Ta trata aki di sigaria elektróniko (vaping). Algun aña pasá no tabatin sifranan definitivo di e konsekuensianan pa salú di sigaria elektróniko i esaki no a keda inkluí den e lei ku a pasa Staten. Awe ta probá ku nikotina sea via ‘vaping’ òf sigaria konvenshonal ta adiktivo i ta kousa malesa króniko i morto. Ademas ‘vaping’ ta keda merkadiá na hóbennan komo algu ‘super cool’ i esaki lo sòru pa hinter un generashon nobo bira adikto na nikotina.
Ta neseario pa atendé ku e frontera nobo di adikshon na nikotina. Mester bin ku lei pa atvertí tur hende di e peliger di nikotina i reglamentá benta di e artíkulonan aki ya hóbennan bou di un sièrto edat no por kumpra nan. Ta bon pa menshoná ku mi a laga dos proyekto di lei na 2016 pa atendé ku esakinan. Mester saka nan for di lachi. E lucha kontra tabako i nikotina mester sigui.
Willemstad, Kòrsou
Alex David Rosaria Blog 