E lei di screening tei pa keda segun e formadó na 2017, pasombra esaki ta importante pa nos “uitstraling” aki i den eksterior (wak video).
Esei tabata 2017.
E lei tabata bon pa esnan sin étika e tempu aya. Pero awor ku e mes un lei a obligá dos mandatario tuma retiro (di kua unu a rekonosé su akto kastigabel i e otro ta un sospechoso) i ku tin un di tres mandatario den un huki, mester kambi’é. E kambionan no ta enserá sera algun buraku den e lei manera Ministerio Públiko a konsehá, pero ta trata di algun kambio supstanshal. Dje supstanshal ei ku e lei nobo ta bira un èkstrakto lali-lali di e lei ku na 2017 “mester a keda pa semper”.
Bo no mester ta un genio pa komprondé e wega aki. Esun ku mas benefisio lo saka pa kambio di lei a traha un moshon detayá kaminda ta habri kaminda pa un lei di screening nobo i sin djente. Ta remarkabel kon detayá e moshon aki ta (normalmente un moshon ta un deseo di Staten pa despues Gobièrnu yena e aspektonan hurídiko). E argumento ku esun ku a traha e moshon a hasi esaki pasombra e ta un hurista, ta duna e impreshon ku Griffie di Staten -ku tin un batayón di hurista den servisio- no ta kapas pa hinka un moshon den otro.
Awor, no ta na Kòrsou so tin kambionan di lei ku un tempu tabata bon pa oponentenan, pero ku derepente no ta sirbi ora nan ta na poder. Mi ta sigur ku paisnan manera Zimbabwe, Chad, Nicaragua, Laos, Congo i mas ta kontentu pa risibí nos den nan filanan.
Bèrgonsoso!
Willemstad, Kòrsou
Alex David Rosaria Blog 