Kòrsou ku un bon maneho di e ekipo di dr. Gerstenbluth te ainda a logra eskivá e pandemia covid 19. E meta original tabata “flatten the curve” pa e siguiente fase esaki bira “crush the curve” den kua nos a mira ku kasonan a keda na 16 pa algun siman. Den e fase ku a pèrmití repatriashon nos a mira un oumento remarkabel di kasi 50% di kasonan di kontaminashon den un periodo kòrtiku.
Riba 1 yüli nos ta habri porta inisialmente pa 10,000 hende bin riba nos isla. No ta un sorpresa ku hopi hende ta nervioso. Ku rason pasombra pueblo a hasi hopi sakrifisio pa minimalisá e daño na salú i bida di hende. Covid 19 no a desaparesé i ainda no tin kura p’e. Ademas, nos poblashon su predisposishon pa keda seriamente afektá pa covid 19 ta haltu debí na e.o. malesa vaskular, diabetis i obesidat.
Tur hende ke pa bida normalisá i ekonomia drei. Kualkier deskuido relatá na e reapertura por kousa un brote ku konsekuensia fatal pa salú di hende. Esaki kier men tambe ku tur e logronan te ainda pa evitá ku e virus ta plama riba nos isla, ta bai pèrdí i ku mester kuminsá di nobo, posiblemente na un kosto mas haltu pa salú di hende. Paradoksalmente e mesun reapertura ku nos ke pa krea aktividat ekonómiko, por pone nos kai atras ainda mas tantu riba e kaminda pa rekuperashon, sigur si nos mester sera frontera pa di dos biaha.
Reapertura di 1 yüli tin riesgo. Fòrti a bisa korektamente ku den bida tin riesgo. Loke mi a sinti falta despues di e frase aki ta ku Fòrti ta karga tur responsabilidat tambe pa e konsekuensianan di e riesgonan tumá.
Ta rekomendabel pa kada un di nos tuma tur paso nesesario pa kuida nos salú. Miles di hende pa algun luna a konfia nan bida den e mannan kapas di dr. Gerstenbluth. Esaki ya no ta e kaso. Nos bida ta den man di esnan den Fòrti ku ta bai determiná kuantu salú i bida di hende lo keda sakrifiká.
Willemstad, Kòrsou
Alex David Rosaria Blog 
Ta habri, ku riesgo chiki. Te ainda no a mira infekshon nobo for di e.o. Hulanda. Si ta asina, ku pa siguridad mas haltu, esun ku ta traha ku e turista (Restaurant, bendedo di pakus i otro kaminda turistiko), nan husa un mondkapje. E ta ofrese un grado di protekshon, kon tal ku 1. bo no mishi ku e tela despues, 2 tira e mondkapje afo despues di kada uso.
LikeLike
Allex si bo tbt den gobiernu ku 19000 ku por perde trabou si bo no hasi nada kiko lo bo a hasi?
LikeLike
Lo mi lo no a skohe pa sakrifiká bida di hende. Mester habri koutelosamente. Lo mi a sòru pa tin un NOW regeling ku tabata bon formulá i i plementá i no e loke tin awor aki ku ta hole vriendjespolitiek.
LikeLike