Djaluna, 6 yüli 2020 ta dia di CARICOM, Caribbean Community. E organisashon aki a nase na 1973 pa promové koperashon i komèrsio di su miembronan Karibense. CARICOM ta un di e organisashonnan di integrashon mas antiguo na mundu.
Kòrsou di otro banda no ta miembro ni tampoko tin un tratado komersial manera si ta e kaso ku e islanan di CARICOM. Nos den hopi aspekto ta isolá di nos region ku semper nos a konsiderá atrasá den hopi sentido.
Na 2006 mi a bishitá e Sekretario General di CARICOM, Sr. Edwin Carrington na Georgetown (Guyana) komo minister di Antia Hulandes pa èksplorá e kaminda pa kana bira miembro asosiá di e organisashon importante aki. Manera por mira den e video ariba, mi a informá prensa di e “stappenplan” pa ku Karibe.
Ta di lamentá ku te awe no a pasa mashá ku e dossier aki. For di un inisio a resultá ku algun miembro di Konseho di Minister tabata kere ku “si nos aserká Karibe (muchu), nos lo peligrá nos laso ku Hulanda”. E proyekto básikamente a desaparesé den lachi. Pa kolmo awor miembresia (asosiá) a bira muchu mas difísil pa haña kompará ku e kaso na 2006. Awe e nesesidat pa koperashon ku otro paisnan ta mas vigente ku nunka, prinsipalmente debí na e retonan manera pandemia, kambio di klima, refugiado i mas tema ku ta imposibel atendé sin un kuadro legal di koperashon ku bo bisiñanan.
Un pabien na e union di Karibe aki ku ta rumbo pa konmemorá su di 50 aña di eksistensia. Ban spera ku nos ta realisá e importansia pa koperá ku nos bisiñanan ku awe, apesar di retonan mas grandi, tin un futuro briyante na dilanti.
Willemstad, Kòrsou
Alex David Rosaria Blog 
Kompanianan grandi na Kòrsou sa i ta benefisia di strukturanan korporativo similar na e struktura politiko di Caricom. Nan si a komprondé i ta benefisia di por hasi uso di rekursonan i merkado di Caribe kompletu. Mester sigui traha riba desaroyo di nos relashon ku e paisnan i islanan di e region komo un fuente prinsipal di interkambio ekonomiko i soshal.
LikeLike
Danki pa bo kontribushon. Alex
LikeLike