Kiko ami lo a hasi?

 

Ounke ku meta di mi blog ta mas bien un “think tank”, mi sa haña e pregunta: “Kiko abo lo a hasi?” manera ta e kaso ku e kondishonnan mará na e ayudo Hulandes den kuadro di covid 19.

Segun Fòrti tin dos opshon: akseptá òf rechasá. P’ami tin un di tres opshon, esta negoshá i akseptá. Lo mi no a subi ningun kabai emoshonal di WIC ku no ta resolvé nos problemanan.

Na aprel 2020 mi a premirá korektamente ku NOW -debí na mal formulashon i konsekuentemente implementashon- lo resultá den un frakaso. NOW mester keda reformulá. Mester pone kondishonnan estrikto pa atendé ku plaka públiko, sea ku esaki ta di Hulanda òf nos plaka di belasting. Ta basta ku despèrdisio, salarionan eksorbitante i “vriendjespolitiek”. No pa tene Hulanda kontentu, pero pasombra ora malusá plaka di pueblo, t’esnan vulnerabel ta sufri mas.

Tambe mi lo a negoshá ayudo pa krea i fortalesé kapasidat institushonal. Nos institutonan ta karesé struktura, prosedura transparente, “accountability”, efisiensia, teknologia adekuá, i hende kapas na e posishonnan korekto pa asina yuda manehá nos pais na drechi. Si nos ke desaroyo duradero (ménos dependiente di ayudo) nos mester mas kapasidat institushonal. P’esei mi no ta kere ta un instituto Hulandes so mester atendé ku e pakete di ayudo/reforma Hulandes. Ademas, falta di institutonan fuerte ta pone ku e élite semper lo keda probechá i bira mas riku.

Reforma -ku apesar ku nos ta na altura di dje a laga para- ta sumamente nesesario. Pues e eksihensia aki di Hulanda ta korekto. Mester reformá nos strukturanan (hopi bia ankrá den lei antikuá) pa asina nos probechá di e oportunidatnan den mundu. Nos meta mester ta pa nos ta mas produktivo, mas globalmente kompetitivo i konektá. Ta trata di reforma di e.o. enseñansa, labor, ekonomia i medio ambiente.

Finalmente un salida negoshá tin muchu mas benefisio kompará ku imposishon di Den Haag ku por bira un pleitu hurídiko largu den kua esun ku tin mas di pèrdè ta Kòrsou, prinsipalmente esnan den pèrtá.

Mi a skohe un karera diplomátiko i ta kere den diálogo, mantené kabes friu i no “spierballentaal”.  Pa bienestar di nos pais ku ta den un situahon penibel, mi ta spera Fòrti skohe bon.

Willemstad, Kòrsou