Sospechoso? No problem

E titular den un matutino NO TA TRAHA KU SOSPECHOSO NI KONVIKTO no a laga ningun duda unda e organisashon PAR ta pará na 2016. E partido e tempu ei a referí naturalmente na un Miembro di Staten di un otro organisashon ku tabata sospechoso i ku despues a desaparesé den prison. Pero esei tabata 2016. Awe, 2020 e mesun partido no solamente ta bai traha ku un sospechoso, pero e sospechoso ta bai representá e “partido-anti-trahamentu-ku-sospechoso” aki den Staten. T’e mesun persona ku a hañ’é ta baha komo minister pa su status sospechoso, pero ku ta bira representante di pueblo. No mester lubidá ku den nos sistema di demokrasia parlamentario, Staten ta e institushon ku mas poder. Ku esaki ta hiprokresia di marka mayó, kualkier mucha ta komprondé. Por sierto meskos a sosodé ku e lei di screening ku tabata bon “p’e otro pero no pa mi”. Ku e partnernnan den koalishon, representantenan di sektor privá, iglesianan, organisashonnan soshal (ku tabata asina entusiasmá den skibi karta di reklamo pa Den Haag) ta ketu, ta ponemi kòrda riba e polítika eksterior di Beijing: “mi no ta kritiká bo fayonan, pasombra mi no ke abo kritiká esnan di mi”. Ku tur e diskushonnan ku tin tokante di outonomia, nos no ta realisá ku ta eksaktamente e tipo di komportashon aki ta mina nos outonomia, nos outoridat moral i konfiabilidat?

Willemstad, Kòrsou