A bisa ku Gobièrnu a kai pasombra esaki no ta konta mas ku un mayoria den Staten. Esaki sinembargo no ta kuadra.
Un minister ta funshoná a base di e sosten di un mayoria di miembro den Staten. Pa sa si un òf mas minister òf tur minister tin sosten (konfiansa) di un mayoria den Staten, esaki mester tuma lugá den un reunion públiko di Staten den kua kada miembro di Staten ta indiká ofishalmente si e tin konfiansa òf no den un òf mas minister òf tur minister. E miembronan di Staten por hasi esaki solamente den un reunion di Staten. Lokual e miembronan bisa riba kaya òf promé ku e reunion públiko, no ta konta. Durante e reunion públiko e miembronan di Staten mester indiká si nan ta sostené un òf mas minister òf tur minister. Esaki ta tuma lugá a base di un moshon di deskonfiansa ku mester keda entregá. Si un mayoria tin konfiansa den un òf mas minister òf tur minister, ningun hende mester bai kas. Si tin un mayoria ku no ta konfia un òf mas minister òf tur minister, e òf nan mester bai kas.
Ya ku ainda Staten no ta tin e oportunidat ainda pa ‘spreek nan mes uit” den un reunion públiko, Gobièrnu no a kai (ainda). Tambe ta asta posibel ku promé ku un reunion públiko, PAR ta nombra su miembro di Staten, M. Alcala, ku por nifiká ku e Gobièrnu aki ta konta ku un mayoria di 11-10.
Willemstad, Kòrsou
Alex David Rosaria Blog 