Na 1977 tambe a bòikotiá huramentashon pa Staten

E reunion públiko di Staten ku mester a tuma lugá awe pa (e.o.) aprobá e kredensialnan di Sr. Elhage pa esaki huramentá komo Parlamentario, no a kontinuá pasombra no por a forma kuorem. Si nos wak den pasado, nos ta konstatá ku no ta promé biaha ku esaki ta sosodé. Na 1977 tambe esaki a tuma lugá i despues di intervenshon di Gobernadó i dos kaso den Korte, a bin klaridat.

Después di elekshon pa Staten di Antia riba 17 yüni 1977, Partido Demokrat (DP) ta gana na Kòrsou sakando 6 asiento. MEP di Aruba ta surgi komo ganadó ku 5 asiento. For di un komienso ta surgi problema pa forma un Gobièrnu. MEP mirando ku den un eventual Gobièrnu di DP lo a keda na di dos lugá di importansia (no lubidá ku pa MEP e kos mas importante tabata un referèndum pa sali for di Antia) a pone tur tipo di traba pa e formadó Rozendal (DP). MEP tabata preferá forma ku Frente Obrero (3 asiento) i PNP (3 asiento).

Den Staten pues MEP i Frente a sera kabes den e Staten bieu ku mester a baha i no a koperá pa aprobá e kredensialnan di e miembronan di Staten nobo ku mester a huramentá. Nan no a firma e lista di presensia i konsekuentemente no tabatin kuorem. Pa kibra e impase aki, Gobernadó Leito a firma un Landsbesluit riba 6 òktober 1977 pa fòrsa un reunion èkstraordinario pa trata e kredensialnan riba 10 òktober 1977.

Riba 9 òktober 1977, minister demisionario Godett ta kuminsá un kaso den Korte pa fòrsa Gobièrnu destruí e Landsbesluit di 6 òktober. Korte ta rechasá e petishon aki. E ta konstatá ku e Landsbesluit ta legal. Riba 10 di òktober 09:00 tur 22 Miembro di Staten tei presente den sala di reunion. Después ku a indiká ku ta akseptá e veredikto di Korte, Frakshonnan di Frente, MEP i e independiente Guillermo Trinidad (ku tabata PPA pero a bula waya) ta bandoná sala. Kredensialnan ta keda aprobá sinembargo i pa 11:00 tur miembro nobo ku eksepshon di 5 di MEP, ta huramenta serka Gobernadó. Algun dia despues MEP ta entamá un otro kaso den Korte kontra e Miembronan nobo ku sigun e partido a keda huramentá a base di un reunion ilegal. MEP ta pèrdè e kaso. MEP tabata notablemente heridá pasombra e, komo e partido di mas grandi di Aruba, a keda pafó mientras su rival PPA si tabata parti di e kabinete Antiyano.

Willemstad, Kòrsou